މާލެއަށް މިހާރު ކުރަމުންދާ ވިއްސާރައިގައި ގަދަ ވަޔާއެކު މާވެޔޮމަގުގައި ހުރި ބޮޑު ގަހެއް ވެއްޓި ގެއްލުންތަކެއް ވެއްޖެ އެވެ.

އެ ހާދިސާ ހިނގީ މިއަދު ހަވީރު އެވެ. އެ ގަސް ވެއްޓުމުން ޕާކްކޮށްފައި ހުރި ބައެއް އުޅަނދުތަކަށް ވަނީ ގެއްލުންވެފަ އެވެ.

ޕޭޕާ ވޯލްޑު ފިހާރަ ކައިރީ ހުރި އެ ގަސް ބުޑުން ބިންދައިގެން ގޮސް މަގު ހުރަހަށް ވެއްޓުމުން މަގު ބަންދުވެ ގިނަ ބަޔަކަށް ވަނީ ދަތިތަކާ ކުރިމަތިލާންޖެހިފަ އެވެ.

މާލޭ ސިޓީ ކައުންސިލްގެ އޮފިޝަލަކު ވިދާޅުވީ ފުލުހުންނާ ގުޅިގެން އެ ގަސް ނެގުމުގެ މަސައްކަތް ކުރަމުން އަންނަ ކަމަށެވެ.

"ފުލުހުންނާ ގުޅިގެން އަޅުގަނޑުމެން މަސައްކަތް ކުރަމުން މިދަނީ އެ ގަސް ނަގައި އަލުން އެ މަގު ހުޅުވާލުމުގެ މަސައްކަތް،" އޮފިޝަލް ވިދާޅުވި އެވެ.

ގަދަވައިގެ ސަބަބުން އިއްޔެ ވަނީ ހުޅުމާލޭގައި ހުރި ބައެއް ގަސްތައް ވެސް ވެރިފަ އެވެ.

މޫސުމާ ބެހޭ ގައުމީ އިދާރާއިން ވަނީ ރާއްޖޭގެ ހުރިހާ ހިސާބަކަށް ވިލާގަނޑުގައި 55 މޭލަށް ވައި ގަދަވާނެ ކަމަށް ލަފާކޮށް ޔެލޯ އެލާޓް ނެރެފަ އެވެ.

މި ދުވަސްވަރަކީ މޫސުން ގޯސް ދުވަސްވަރަކަށްވުމާއެކު މޫސުމާ ބެހޭ ގައުމީ އިދާރާއިން މައުލޫމާތު ހޯދުމަށްފަހު ނޫނީ ކަނޑުދަތުރުތައް ނުކުރުމަށް އެމްއެންޑީއެފް އިން ވަނީ އިލްތިމާސްކޮށްފަ އެވެ.