ބޮލީވުޑްގެ ތަރި އަމީތާބު ބައްޗަންގެ އަންހެނުން ޖާޔާ ބައްޗަންއަކީ ރުޅިގަދަ މީހެއްގެ ގޮތުގައި އަބަދުވެސް ބެލެވިފައިވާ ތަރި އެކެވެ. އޭނާގެ ރުޅިގަނޑު އެކި ފަހަރު މަތިން މީޑިއާއަށް ވެސް އަމާޒުވެފައިވެ އެވެ.

އެހެން ނަމަވެސް ގިނަ ބަޔަކަށް ނޭނގޭ ކަމަކީ ޖާޔާގެ ރުޅިގަނޑުގެ ޝިކާރައަކަށް ޚުދު އަމީތާބާއި އޭނާގެ މަސައްކަތްތައް ވެސް ވާ ކަމެވެ. އަމީތާބު ވަނީ އެކަން މީޑިއާއަށް ޔަގީން ކޮށްދީފަ އެވެ.

އެކްޓްރެސް ސިމީ ގަރެވާލްގެ ޓޯކް ޝޯގައި ވާހަކަ ދައްކަމުން އަމީތާބު ބުނީ އޭނާގެ ފިލްމުތަކުގެ ސަބަބުން ޖާޔާ ރުޅި އައިސްގެން ސިނަމާއިން ނުކުމެގެން ނުދާ އެންމެ ފިލްމެއް ވެސް ނުދާ ކަމަށެވެ.

އެގޮތުން 1981 ވަނަ އަހަރު ނުކުތް ފިލްމު "ލާވާރިސް"ގައި ހިމެނުނު ލަވައެއް ކަމަށްވާ "މެރޭ އަގްނޭ މޭ ތުމްހާރާ ކިޔާ ކާމްހޭ" ލަވަ އަމީތާބު ފާހަގަކުރި އެވެ.

އަމީތާބު ބުނީ އެ ލަވައިގެ ސަބަބުން ޖާޔާގެ ރުޅިގަނޑު ފަޅައިގެން ދިޔަ ކަމަށާއި އެންމެންގެ ކުރިމަތީގައި އޭނާއަށް ހަޅޭއްވެސް ލަވާފައިވާ ކަމަށެވެ.

މިކަމާ ބެހޭ ގޮތުން ޖާޔާ ބުނީ އެ ލަވައިގައި ދައްކާފައިވާ ވާހަކަތަކަކީ ބޭއަދަބީ ވާހަކަތަކެއް ކަމަށް އޭނާއަށް ގަބޫލު ކުރެވުނު ކަމަށާއި ހިތްހަމަ ނުޖެހުނީ އެހެންވެ ކަމަށެވެ.