ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ދިރިއުޅުއްވާ މުރައިދޫގެގެ މުވައްޒަފުންގެ މައުލޫމާތު ހާމަކުރުމަކީ މަޖިލީހުގެ ރައީސަށް އޮތް ނުރައްކަލެއް ކަމަށް ނިންމުމަށްފަހު، އެ ނިންމުން ބަދަލުކޮށް އެ މައުލޫމާތު ހާމަކުރަން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީން ފާސްކޮށްފި އެވެ.

މުރައިދޫގޭ މުވައްޒަފުންގެ އަދަދާއި އެ މީހުންގެ މުސާރައިގެ ތަފުސީލް ހޯދަން އެކި ފަރާތްތަކުން ވަނީ މަޖިލީހުގެ އިދާރާގައި އެދިފަ އެވެ. އެގޮތުން "ހުރިހާ" އިން ވެސް ވަނީ އެކަމާ ގުޅޭ މައުލޫމާތުތަކެއް ހޯދަން މަޖިލީހުގެ އިދާރާގައި އެދިފަ އެވެ.

ކުއްލިގޮތަކަށް އެ ނިންމުން ބަދަލުކޮށް، މައުލޫމާތު ހާމަކުރަން ނިންމި ސަބަބެއް މަޖިލީހުގެ އިދާރާއިން ހާމައެއް ނުކުރެ އެވެ.

މަޖިލީހުގެ ރައީސް ދިރިއުޅުއްވާ ގެކޮޅުގެ މުވައްޒަފުންގެ އަދަދާއި ނަމާއި ވަނަވަރު ހާމަކޮށްފި ނަމަ މަޖިލީހުގެ ރައީސަށް ނުރައްކާވެދާނެ ފަދަ ކަމެއް އޮތް ނިންމުމަށްފަހު ނުރައްކާ ނުވާގޮތަށް ކުއްލިއަކަށް ބަދަލުވުމުން ގިނަ ބަޔަކު އަންނަނީ އެކަމަށް ފާޑުކިޔަމުންނެވެ.

މުރައިދޫގޭގެ މައުލޫމާތު ނުދޭން ނިންމި ނިންމުމަށް ދެކޮޅު ހެއްދެވީ ހަނިމާދޫ ދާއިރާގެ މެމްބަރު އަބްދުލްޣަފޫރު މޫސާ އެވެ.