ސަރުކާރުގެ ސިޔާސީ މުވައްޒަފުންގެ އަދަދު 1200 އަށް ވުރެން މަތިކަން ހާމަވެއްޖެ އެވެ.

މައުލޫމާތު ހޯދާ ލިބިގަތުމުގެ ގާނޫނުގެ ދަށުން "މިހާރު" ނޫހުން ސިޔާސީ މަގާމުތަކުގައި ތިބި މުވައްޒަފުންގެ އަދަދާއި ތަފްސީލު ހޯދުމަށް އެދިގެން، ޖުލައި މަހުގެ ނިޔަލަށް ސަރުކާރުގެ އެކި އިދާރާތަކުގައި 1200 އަށް ވުރެ ގިނަ މުވައްޒަފުން ތިބިކަމަށް މިއަދު ރިޕޯޓްކޮށްފައިވެ އެވެ.

ރައީސް އޮފީސް ހިމެނޭ ގޮތަށް 16 އިދާރާއަކުން ހިއްސާކުރި މައުލޫމާތަށް ބަލާއިރު ޖުލައި މަހުގެ ނިޔަލަށް ޖުމްލަ 1،249 ސިޔާސީ މުވައްޒަފުން ތިބިކަމަށް އެ ނޫހުން ރިޕޯޓްކޮށްފައިވެ އެވެ.

ނަމަވެސް މައުލޫމާތު ހާމަނުކުރާ ހަތަރު މިނިސްޓްރީވެސް ހިމެނެ އެވެ. އެއީ ޔޫތު މިނިސްޓްރީ، ހައުސިން މިނިސްޓްރީ އާއި ޓްރާންސްޕޯޓް މިނިސްޓްރީ އަދި ފޮރިން މިނިސްޓްރީ ކަމަށް އެ ނޫހުން ބުނެފައިވެ އެވެ.

ރައީސް އޮފީހުގެ ވެބްސައިޓުގައި މި ހަތަރު މިނިސްޓްރީ ތަކުގެ ސިޔާސީ މުވައްޒަފުންގެ ތެރެއިން ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުންގެ ގޮތުގައި ޖުމްލަ 32 ބޭފުޅަކު އެބަ ތިއްބެވެ. ނަމަވެސް ހަތަރު މިނިސްޓްރީގެ ސިޔާސީ މަގާމުގެ އަދަދު މިއަށްވުރެ އެތައް ގުނައެއް އިތުރުވާނެ ކަމަށް ލަފާކުރެވެ އެވެ. ރައީސް އޮފީހުން މައުލޫމާތު ހާމަނުކުރާ ސްޓޭޓް މިނިސްޓަރުންނާއި ޑެޕިއުޓީ މިނިސްޓަރުންވެސް ތިއްބަވަ އެވެ.

އެހެންކަމުން ޖުމްލަ އަދަދު 1300 އަށް ވުރެ މަތިވާނެކަމަށް ބެލެވެ އެވެ.

ޖުލައި މަހާ ހަމައަށް ސިޔާސީ މަގާމުތަކުގެ އަދަދުތައް:

ފިނޭންސް މިނިސްޓްރީ - 14

ސޯޝަލް އެންޑް ފެމިލީ މިނިސްޓްރީ - 67

ޓޫރިޒަމް މިނިސްޓްރީ - 32

އެޑިއުކޭޝަން މިނިސްޓްރީ - 34

އެންވަޔަރަންމަންޓް މިނިސްޓްރީ - 51

ހަޔާ އެޑިއުކޭޝަން މިނިސްޓްރީ - 30

ފިޝަރީޒް މިނިސްޓްރީ - 43

އިކޮނޮމިކް މިނިސްޓްރީ - 37

ހެލްތު މިނިސްޓްރީ - 218

ސްޕޯޓްސް މިނިސްޓްރީ - 205

އިސްލާމިކް މިނިސްޓްރީ - 37

ހޯމް ލޭންޑް މިނިސްޓްރީ - 54

ޑިފެންސް މިނިސްޓްރީ - 4

ކޮންސްޓްރަކްޝަން މިނިސްޓްރީ - 43

އެގްރިކަލްޗާ މިނިސްޓްރީ - 35

ރައީސް އޮފީސް - 345

ހަރަދު ކުޑަކުރުމުގެ ގޮތުން އަޅުއްވާ ފިޔަވަޅެއްގެ ގޮތުގައި ސިޔާސީ މަގާމުގައި ތިއްބެވި 228 ބޭފުޅަކު ވަކިކުރައްވަން ރައީސް މުއިއްޒު ނިންމަވާ އިއްޔެ ވަނީ އިއުލާން ކުރައްވާފަ އެވެ. އެގޮތުން 15 ދުވަސް ތެރޭގައި ސިޔާސީ މަގާމުތަށް މަދުކުރައްވާނެކަމަށް ރައީސް ވަނީ ވިދާޅުވެފަ އެވެ.

އެގޮތުން 7 ސްޓޭޓް މިނިސްޓަރުންނާއި، 43 ޑެޕިއުޓީ މިނިސްޓަރުން، 109 ސީނިއާ ޕޮލިޓިކަލް ޑައިރެކްޓަރުންގެ އިތުރުން 69 ޕޮލިޓިކަލް ޑައިރެކްޓަރުން ވަޒީފާއިން ވަކިކުރެއްވުމަށް ރައީސް ވަނީ ނިންމަވާފަ އެވެ.

މި އަދަދަށް މުވައްޒަފުން ވަކި ކުރުމުންވެސް މި ސަރުކާރުގެ ސިޔާސީ މަގާމުތަކުގެ އަދަދު 1000 އަށް ވުރެ މަތިވާނެކަމަށް ބެލެވެ އެވެ.

ރައީސް މުއިއްޒު ރިޔާސީ އިންތިހާބުގެ ކެމްޕޭން ދުވަސްވަރު ވިދާޅުވެފައިވަނީ ސިޔާސީ މަގާމުތައް ގިނަ ނުކުރައްވާނެ ކަމަށެވެ. އަދި ކުރީގެ ސަރުކާރުން ސިޔާސީ މަގާމުތަކުގައި ގިނަ ބޭފުޅުން ތިއްބަވާކަމަށް ވިދާޅުވެ ވަރަށް ބޮޑަށް ފާޑުވެސް ވިދާޅުވަމުން ގެންދެވި އެވެ. ސިޔާސީ މަގާމުތަކުގެ އަދަދާ ގުޅޭ ގޮތުން މި އަހަރު ކުރީކޮޅު ސަރުކާރުން ބުނެފައިވަނީ ސިޔާސީ މުވައްޒަފުންގެ އަދަދު 700 އަށް ވުރެ މަތި ނުވާނެ ކަމަށެވެ.