ކިއާރާ އަދްވާނީއަކީ މިވަގުތު ބޮލީވުޑްގައި އަަރަމުން އަންނަ އަންހެން ތަރިންގެ ތެރެއިން އެންމެ އުޖާލާ މުސްތަގުބަލެއް އޮތް ތަރި ކަމުގައި ގިނަ ބަޔަކު ގަބޫލުކުރެ އެވެ.

ކާމިޔާބު ފިލްމުތަކަކަށްފަހު ބޮލީވުޑްގެ އެންމެ އިސް ސަފުގައި ކިއާރާ ގުނާލެވޭއިރު ގިނަ ބަޔަކަށް ނޭނގޭ ކަމަކީ ކިއާރާއަކީ އޭނާގެ އަސްލު ނަން ނޫން ކަމެވެ.

ކިއާރާ އަދްވާނީގެ މައިންބަފައިން އޭނާއަށް ދީފައިވާ ނަމަކީ އާލިއާ އަދްވާނީ އެވެ. ކުޑައިރުން ފެށިގެން ބޮލީވުޑްއަށް ވަނުމާ ހަމައަށް އޭނާ ބޭނުންކުރީ އެ ނަމެވެ.

އެހެން ނަމަވެސް ބޮލީވުޑަށް ވަނުމުގެ ކުރިން އޭނާގެ ނަން "ކިއާރާ"އަށް ބަދަލުކުރީ ބޮލީވުޑްގެ މަޝްހޫރު އެކްޓަރު ސަލްމާން ޚާންގެ ލަފާގެ މަތިންނެވެ.

ބޭނުމަކަށްވީ ކިއާރާ ބޮލީވުޑަށް ވަތް ދުވަސްވަރު "އާލިއާ" ނަަމަކަށް ކިޔާ އެހެން ތަރިއެއް ބޮލީވުޑްގައި މަޝްހޫރުވެފައިވުމާއެކު ނަމުގެ އޮޅުންބޮޅުން ފިލުވުމެވެ.

2014 ވަނަ އަހަރު ރިލީޒް ކުރެވުނު ފިލްމު "ފަގްލީ"އިން ކިއާރާ ބޮލީވުޑަށް ނުކުތްއިރު އެހެން ތަރިއެއް ކަމަށްވާ އާލިއާ ބަޓް ވަނީ އާއްމުންގެ ހިތްތަކުން ޖާގަ ހޯދާފަ އެވެ.

އެހެން ކަމުން އެ ދެތަރިންގެ ނަމާ ގުޅިގެން އުފެދިދާނެ އޮޅުމެއް ފިލުވުމުގެ ބޭނުމުގައާއި މަޝްހޫރުވެފައިވާ ނަމެއް ބޭނުންކޮށްގެން ފުރުސަތުތައް ހޯދަން ބޭނުން ނުވާތީ ކިއާރާ އޭނާގެ ނަން ބަދަލުކުރީ އެވެ.

ކިއާރާ އޭނާގެ ކެރިއަރުގައި މިހާތަނަށް ކާމިޔާބު ފިލްމުތަކެއް ކުޅެފައިވާއިރު ކުރިއަށްވެސް އޭނާގެ އުއްމީދީ ޕްރޮޖެކްޓްތަކެއް އެބަ ހުއްޓެވެ.