ދުނިޔޭގެ ބާޒާރުގައި ރަނުގެ އަގު ރެކޯޑް މިންވަރަކަށް އުފުލި ރަނުގެ ބާޒާރުގައި ތާށިތަކެއް ކުރިމަތިވަމުން އަންނަ ކަމަށް މާހިރުން ބުނެފި އެވެ.

ތަފާސްހިސާބުތަކުން ދައްކާ ގޮތުގައި މިދިޔަ އަހަރާ އަޅާބަލާއިރު މި އަހަރު އެކަނި ވެސް ރަނުގެ އަގު 37 ޕަސެންޓް ބޮޑުވެފައިވެ އެވެ.

އެގޮތުން މިވަގުތު ދުނިޔޭގެ ބާޒާރުގައި އެއް އައުންސް (ގާތްގަނޑަކަށް 28 ގްރާމް)ގެ ރަނުގެ އަގު އުޅެނީ 2160 އެމެރިކާ ޑޮލަރުގަ އެވެ.

މި އަގު ކުރިއަށް އޮތް ތަނުގައިވެސް ބޮޑުވާނެ ކަމަށް ލަފާކުރެވޭއިރު މިއީ ރަނުގެ ޑިމާންޑް ބޮޑުވެ އެއާ އެއްވަރަށް ރަން ނުލިބޭތީ ދިމާވާ ކަމެއް ކަމަށް އިގްތިސާދީ މާހިރުން ބުނެ އެވެ.

ބާޒާރުގައި ރަނުގެ އަގު ބޮޑުވާނެ ކަމަށް ލަފާ ކުރެވޭތީ މިދުވަސްވަރު ރަން ގަންނަ މީހުން ވެސް އިތުރުވެ ޑިމާންޑް ވަނީ އިންތިހާއަށް ބޮޑުވެފަ އެވެ.

ރަނަކީ ޖަވާހިރުގެ ގޮތުގައި ދުނިޔޭގެ ގިނަ އަދަދެއްގެ ބަޔަކު ބޭނުންކުރާ މާއްދާއަކަށްވާއިރު ރަނަށް އޮންނަ ޑިމާންޑްވެސް ދުވަހަކަށްވުރެ ދުވަހެއް އިތުރުވަމުންދެ އެވެ.