ދާ ކޮންމެ ތަނަކަށް ވެސް ފަހަތުން މީޑިއާގެ އޮފިޝަލުން އަންނާތީ ބޮލީވުޑްގެ މަޝްހޫރު އެކްޓަރު އަބީޝޭކް ބައްޗަން ރުޅިގަދަ ވެއްޖެ އެވެ.

މި ހާދިސާ ހިނގާފައިވަނީ ބޭރު ގައުމެއްގައި "ހައުސްފުލް 5"ގެ ޝޫޓިން ނިންމާލުމަށްފަހު އަބީޝޭކް އެނބުރި އިންޑިއާއަށް އައި ވަގުތު މުމްބާއީގެ އެއާޕޯޓު ތެރެއިންނެވެ.

އަބީޝޭކް އެއާޕޯޓުން ނުކުންނަން މަސައްކަތް ކުރިއިރު އޭނާގެ ވަށައިގެން ކެމެރާމަނުން އައީ އެ މަންޒަރު ވީޑިއޯކުރަން މަސައްކަތް ކުރަމުންނެވެ.

އެންމެ ފަހުން އެކަމާހެދި އުނދަގޫ ވުމުން އަބީޝޭކް ވަނީ ދެ އަތް ޖޯޑުކޮށް މިހާރު ފުދޭވަރު ވެއްޖެ ކަމަށް ކެމެރާމަނުން ކައިރީގައި ބުނެފަ އެވެ.

އަބީޝޭކްއަކީ މިދުވަސްވަރު ބޮލީވުޑްގެ ފަލަ ސުރުހީތަކުން އެންމެ ގިނައިން ޖާގަހޯދާ އެއް ތަރި އެވެ. ސަބަބަކަށްވަނީ އޭނާއާއި އައިޝްވާރްޔާ ރާއީގެ ޒާތީ ދިރިއުޅުމެވެ.

އެ ދެމީހުންގެ މެދުގައި މައްސަލަޖެހި ކައިވެނި ރޫޅިފައިވާ ކަމަށް ރިޕޯޓުތައް ބުނާއިރު އައިޝްވާރްޔާއާއި އޭނާގެ ދަރިފުޅު އާރަދްޔާ މިހާރު ދިރިއުޅެނީ އަބީޝޭކްގެ އާއިލާއާ ވަކިންނެވެ.

މި ސަބަބަށްޓަކައި އެ ދެމީހުންގެ އިތުރު ހަބަރުތައް ހޯދަން މީޑިއާގެ އޮފިޝަލުން ދެމީހުން ދާ ކޮންމެ ތަނަކަށް ވެސް ފަހަތުން ދެ އެވެ.