އައިއޭއީއޭގައި ބައިވެރިވުމަށް މަޖިލީހުން ރުހުން ދީފި

އައިއޭއީއޭ (އިންޓަނޭޝަނަލް އެޓޮމިކް އެނާޖީ އެޖެންސީ) ގައި ރާއްޖެއިން ބައިވެރިވުމަށް ރައްޔިތުންގެ މަޖިލީހުން މިއަދު ރުހުން ދީފި އެވެ. ނިއުކްލިޔާ ހަކަތަ ގެންގުޅުން ރެޖިއުލޭޓްކުރުމަށް މަސައްކަތް ކުރާ މި އެޖެންސީއާ ގުޅުމަށް ވޯޓު ދެއްވާފައިވަނީ 61 މެންބަރުންނެވެ.

މި އޭޖެންސީގައި ރާއްޖެ ބައިވެރިވެފައިވަނީ ވަޒީރުންގެ މަޖިލީހުން މި އެޖެންސީގައި ބައިވެރިވުމަށް ނިންމެވުމަށް ފަހު މަޖިލީހަށް ފޮނުވުމުންނެވެ.

މި އެޖެންސީގައި ރާއްޖެ ބައިވެރިވާން މި ސަރުކާރުން ނިންމި މައިގަނޑު އެއް ސަބަބަކީ ދިވެހިރާއްޖޭގައި މިހާރު ދެވެންނެތް ނިއުކްލިޔާ މެޑިސިންގެ ފަރުވާ ދިނުމަށް އެހީތެރިކަން ހޯދުމަށެވެ. ކެންސަރަށް ބޭނުންވާ ރޭޑިއޭޝަން ތެރަފީ ފަދަ ފަރުވާތަކަކީ މި ނިއުކްލިއާ މެޑިސިންގެ ތެރޭގައި ހިމެނޭ ފަރުވާ އެވެ. މި އެޖެންސީގައި ބައިވެރިވުމުން މިފަދަ ފަރުވާތައްވެސް ރާއްޖޭގައި ދިނުމަށް މަގުފަހިވެގެންދާނެ އެވެ.

ނިއުކްލީއާ މެޑިސިން ދާއިރާގެ އިތުރުން މި އެޖެންސީއާ ގުޅުމުން އިއާދަކުރަނިވި ހަކަތައިގެ ދާއިރާއިންވެސް ރާއްޖެއަށް ފައިދާ ކުރާނެކަމަށް ބެލެވެ އެވެ.

އައިއޭއީއޭ އަކީ 29 ޖުލައި 1957 ގައި އުފެއްދި އިދާރާއެކެވެ. މިއީ ރައްކާތެރިކަމާއިއެކު ނިއުކްލިއާ ހަކަތަ ބޭނުންކުރަން އެހީތެރިވެދޭ އެޖެންސީ އެވެ. 178 މެންބަރުން މިހާރުވެސް ހިމެނޭ މި އެޖެންސީއާ ގުޅޭ ގައުމުތަކަށް ނިއުކްލިއާ އެނާޖީ ރައްކާތެރިކަމާއި އެކު ބޭނުންކުރާނެ ޓެކްނިކަލް އެހީތެރިކަމާއި، ރީސާޗް އެހީތެރިކަމުގެ އިތުރުން ގާނޫނީ އެހީތެރިކަންވެސް ދެ އެވެ.

މި ސަރަހައްދުން މި އެޖެންސީގައި ބައިވެރިނުވެ އޮތީ ރާއްޖެ އަދި ބޫޓާން އެކަންޏެވެ.