ބޮލީވުޑްގެ މަޝްހޫރު ކޮރިއަގްރާފަރު އަދި ޑައިރެކްޓަރު ރިމޯ ޑި ސޫޒާއާއި އޭނާގެ އަންހެނުން ލިޒޭލް ޑި ސޫޒާއަށް މަކަރާއި ހީލަތުގެ ތުހުމަތުތަކެއް އަމާޒުވެއްޖެ އެވެ.

އިންޑިއާގެ އަވަށެއް ކަމަށްވާ ތާނޭގެ ފުލުސް އޮފީހަށް ހުށައެޅުނު އެ މައްސަލާގައި ބުނެފައިވަނީ އެ ދެމަފިރިން އެކުވެގެން ނެށުންތެރިންގެ ގްރޫޕަކަށް ހީލަތްތެރި ވެފައިވާ ކަމަށެވެ.

އެގޮތުން އެއީ އެމީހުންގެ އަމިއްލަ ގްރޫޕެއް ކަމަށް ބުނެ ނެށުމުގެ ޓީވީ ޝޯއެއް ކާމިޔާބު ކުރުމުން އެ ގްރޫޕަށް ލިބުނު 11.96 ކްރޯޑް ރުޕީސް އަތުލާފައިވާ ކަމަށް އެ މައްސަލާގައި ބުނެފައިވެ އެވެ.

ރެމޯއާއި ލިޒޭލްގެ އިތުރުން ވެސް ފަސް ފަރާތަކަށް އެ ތުހުމަތުތައް ކުރެވިފައިވެ އެވެ. އެއީ ރޯހިތު ޖާދަވް، ޝަންކަރު ޗޯހަން، ވިނޯދް ރައުޓް، ރަމޭޝް ގުޕްތާ އަދި ފްރޭމް ޕްރޮޑަކްޝަން ކޮމްޕެނީ އެވެ.

މި މައްސަލައާ ގުޅިގެން ރެމޯއާއި އޭނާގެ އަންހެނުން އެމީހުންގެ އިންސްޓަގްރާމް ޕޭޖު މެދުވެރިކޮށް ނެރެފައިވާ ބަޔާނުގައި ބުނެފައިވަނީ އެއީ އެއްވެސް ހަގީގަތެއް ނެތް ތުހުމަތުތަކެއް ކަމަށެވެ.

އެއާއެކު މައްސަލައިގެ ތަހުގީގުގައި ކަމާބެހޭ އިދާރާތަކަށް ދޭންޖެހޭ ފުރިހަމަ އެއްބާރުލުން އަބަދުވެސް ދޭނެ ކަމަށް ރެމޯއާއި ލިޒޭލް ބުނެފައިވެ އެވެ.

ރެމޯއަކީ ބޮލީވުޑްގައި ނަން މަޝްހޫރު ކޮރިއޮގްރާފަރެއްގެ އިތުރުން ޑައިރެކްޓަރެއް ވެސްމެ އެވެ. އެއާއެކު އޭނާ ވަނީ ނެށުމުގެ ގިނަ ރިއަލިޓީ ޝޯތަކަށް އިންސާފުވެސް ކޮށްދީފަ އެވެ.