ސަރުކާރު ހިންގާ ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) އިން މީހުންގެ ޣައިރު ހާޒިރުގައި ސޮއި ފޯޖްކޮށްގެން ޕާޓީއަށް ފޯމް ފުރާކަމުގެ ތުހުމަތުކޮށްފި އެވެ.

ޕީއެންސީއަށް މެންބަރުން އިތުރު ކުރުމަށް އެ ޕާޓީން ގިނަ މައްސަކަތްތަކެއް ކުރަމުންދާ މިދުވަސްވަރު، ޕީއެންސީގެ ބައެއް ފަރާތްތަކުން މީހުންގެ ސޮއި ފޯޖްކޮށް ފޯމް ފުރަމުންދާކަމަށް ބުން ސޯޝަލް މީޑިއާގައި ފާޑުކިޔުން ވަނީ އަމާޒުވެފަ އެވެ.

އެގޮތުން މީހަކު އެކްސްގައި ފޮޓޯ ތަކަކާއެކު ހިއްސާކޮށްފައިވާ ޕޯސްޓެއްގައި ސަރުކާރުގެ ސިޔާސީ މަގާމުތަކުގައި ތިބި ބައެއް މީހުނާއި ޕާޓީގެ ބައެއް ފަރާތްތަކުން ލިސްޓްތަކެއް ހިފައިގެން ތިބެ ފޯމް ފުރުމުގެ މަސައްކަތް ކުރާތަން ފެނެ އެވެ.

"ހުރިހާ" އަށް އެނގިފައިވާ ގޮތުގައި ޕީއެންސީން ދަނީ ޕީޕީއެމްގެ ދަފުތަރުގައި ތިބި މީހުންގެ ނަމުގައި އެމީހުންގެ ޣައިރު ހާޒިރުގައި ފޯމް ފުރަމުންނެވެ. ފޯމް ފުރުމުގެ މަސައްކަތްތައް ކުރަމުން ގެންދަނީ ސަރުކާރު އިދާރާތަކުގައި ސަރުކާރުގެ ވަސީލަތްތައް ބޭނުން ކޮށްގެނެވެ. ބައެއް ފަރާތްތަކުން ތުހުމަތު ކުރާ ގޮތުގައި ޑީއެންއާރުން ރައްޔިތުންގެ މައުލޫމާތު ނަގައިގެން ޑީއެންއާރް ތެރޭގައިވެސް ފޯމް ފުރުމުގެ މަސައްކަތް ދަނީ ކުރަމުންނެވެ. މީގެ އިތުރުން ޔޫތު މިނިސްޓްރީ ތެރޭގައިވެސް ފޯމް ފުރުން ކުރިއަށްދާކަން ވަނީ އެނގިފަ އެވެ.

38،000 މެންބަރުން ތިބި ޕީޕީއެމްގެ ގިނަ މެންބަރުން ޕާޓީ ބަދަލުކުރަން ދެކޮޅު ހަދަމުން ދިޔުމާއެކު، ޕީއެންސީއަށް ބޭނުންވާ އަދަދަށް ފޯމް ހަމަކުރުމަށް ވަނީ ގޮންޖެހުންތަކާއި ކުރިމަތިވެފަ އެވެ.

މީހުންގެ ޣައިރު ހާޒިރުގައި ސޮއި ޕޯޖްކޮށް ޕީއެންސީއަށް ފޯމް ފުރާކަމަށް ބުނެ އާއްމުކޮށްފައިވާ ފޮޓޯއެއް --- ފޮޓޯ އެކްސް

އެކަމާއި ގުޅިގެން ސިޔާސީ މަގާމުތަކުގައި ތިބި މީހުން ވަކި އަދަދަކަށް ފޯމް ހަމަކުރުމުގެ ގޮތުން ދަނީ ޕީޕީއެމްގެ މެންބަރުންގެ ސޮއި ފޯޖްކޮށް ފޯމް ފުރައިގެން ޕާޓީއާ ހަވާލުކުރަމުންނެވެ. މީގެ އިތުރުން ޕީއެންސީން ދަނީ ރާއްޖޭގެ ދެވަނައަށް އެންމެ ބޮޑު ޕާޓީ ޕީޕީއެމް އުވާލުމަށްވެސް މަސައްކަތް ކުރަމުންނެވެ.

މީހުންގެ ޣައިރު ހާޒިރުގައި ސޮއި ޕޯޖްކޮށް ޕީއެންސީއަށް ފޯމް ފުރާކަމަށް ބުނެ އާއްމުކޮށްފައިވާ ފޮޓޯއެއް --- ފޮޓޯ އެކްސް

އިއްޔެގެ ވަގުތެއްގައި ޕީއެންސީގެ ޕާލިމެންޓަރީ ގްރޫޕް ލީޑަރު އިބްރާހިމް ފަލާހު ވިދާޅުވެފައިވަނީ މިހާރު ޕީއެންސީއަށް 65،000 ފޯމް ހަމަވެފައިވާ ކަމަށެވެ.