ގިނަ ބަޔަކު އިންތިޒާރު ކުރަމުން އަންނަ އިންޑިއާގެ ފިލްމު "ޕުޝްޕާ 2: ދަ ރޫލް" ރިލީޒް ކުރުމުގެ ކުރިން ވެސް އެ ފިލްމަށް ބޮޑު އާމްދަނީއެއް ލިބިއްޖެ އެވެ.

ހަބަރުތައް ބުނާ ގޮތުގައި ޕުޝްޕާ 2ގެ ޕްރީ ރިލީޒް ވިޔަފާރީގައި މިހާތަނަށް 1000 ކްރޯޑް ރުޕީސްއަށްވުރެ ބޮޑު އާމްދަނީއެއް ލިބިފައިވެ އެވެ.

މިދިޔަ ބުރާސްފަތި ދުވަހު އެ ފިލްމުގެ ޕްރޮޑިއުސަރުން ބޭއްވި ނޫސްވެރިންގެ ބައްދަލުވުމެއްގައި ފިލްމުގެ އެއް ޕްރޮޑިއުސަރު ކަމަށްވާ ރަވީ ބުނީ އެކި ގޮތްގޮތުން އެ ފިލްމަށް 1000 ކްރޯޑަށްވުރެ ބޮޑު އާމްދަނީއެއް ލިބިފައިވާ ކަމަށް ލަފާ ކުރެވޭ ކަމަށެވެ.

އެގޮތުން މުޅި ދުނިޔޭގައި އެ ފިލްމުގެ ތިއޭޓްރިކަލް ރައިޓްސް 600 ކްރޯޑަށް ވިކިފައިވާއިރު އޯޓީޓީ ރައިޓްސް ވިކިފައިވަނީ 275 ކްރޯޑަށެވެ. އެއާއެކު ސެޓަލައިޓް ރައިޓްސް 85 ކްރޯޑަށް ވިކިފައިވާކަން ވެސް އެނގެ އެވެ.

އެއާއެކު އޭނާ ވަނީ އަންނަ ޑިސެމްބަރު މަހުގެ ފަސްވަނަ ދުވަހު އެ ފިލްމު ސިނަމާތަކުގައި އަޅުވާނެކަން ވެސް އިއުލާން ކޮށްފަ އެވެ.

އައްލޫ އަރްޖުންއާއި ރަޝްމިކާ މަންދަނާ މުހިއްމު ރޯލުތަކުން ފެނިގެންދާ "ޕުޝްޕާ 2"އަކީ އެ ފިލްމުގެ ފުރަތަމަ ބައި ފަދައިން ކާމިޔާބު ފިލްމަކަށް ވާނެ ކަމަށް ބެލެވެ އެވެ.