1997 ވަނަ އަހަރު ރިލީޒް ކުރެވުނު ހޮލީވުޑް ފިލްމު "ޓައިޓޭނިކް"ގެ ނިންމުމަކީ މިއަދާ ހަމައަށްވެސް ގިނަ ބަޔަކު އެކަމާމެދު ބަހުސްކުރާ ކަމެކެވެ.

ފިލްމުގެ އެންމެ ފަހު މަންޒަރުގައި ފިލްމުގެ އަންހެން ލީޑު ކޭޓް ވިންސްލެޓް ހަލާކުވެފައި އޮތް ލަކުޑިގަނޑެއް (ބެލެވޭ ގޮތުގައި ދޮރެއް)ގެ މަތީގައި އޮންނައިރު ފިރިހެން ލީޑު ލިއޮނާޑޯ ޑިކެޕްރިއޯ އޮންނަނީ އެ ލަކުޑިގަނޑުގައި އެލިގަނެގެން ފެނުގަ އެވެ.

ނަތީޖާއަކަށްވީ އެޓްލާންޓިކް ކަނޑުގެ ފިނީގެ ސަބަބުން ލިއޮނާޑޯގެ ކެރެކްޓަރު ޖެކް ޑޯސަން މަރުވުމެވެ. ކޭޓްގެ ކެރެކްޓަރު ރޯސް ޑެވިޓް ސަލާމަތްވީ އެވެ.

އެހެން ނަމަވެސް އެއާއެކު އުފެދުނު ބަހުސަކީ އެ ލަކުޑިގަނޑުގައި އެ ދެމީހުންނަށް އޮވެވޭ ވަރަށް ޖާގަ އޮތް ކަމަށް ކުރެވެން ފެށި ބަހުސެވެ. އެގޮތުން ވަކި ގޮތަކަށް އޮތްނަމަ ދެ މީހުން ވެސް ސަލާމަތްވީސް ކަމަށް ގިނަ ބަޔަކު ބުނަމުން ދިޔަ އެވެ.

މިކަން އިތުރަށް ބެލުމަށްޓަކައި އެ ލަކުޑިގަނޑުގެ ސާމްޕަލްއަކާއި ސްޓަންޓް ޑަބަލް އެކްޓަރުން ބޭނުންކޮށްގެން ބެލި ބެލުންތަކަށްފަހު ފިލްމުގެ ޑައިރެކްޓަރު ބުނީ އެ ލަކުޑިގަނޑުގައި ދެ މީހުން އޮތްނަމަ ޖެކް ސަލާމަތްވުމުގެ ފުރުސަތު އޮތް ކަމަށާއި އެހެން ނަމަވެސް އެވަގުތު ޖެކްގެ ވިސްނުން ހުރީ އަމިއްލަ ސަލާމަތަށްވުރެ ރޯޒްގެ ރައްކާތެރިކަން ޔަގީން ކުރަން ކަމަށެވެ.

މިކަމާ ބެހޭގޮތުން ވާހަކަ ދައްކަމުން ފިލްމުގެ ލީޑު އަންހެން ތަރި ކޭޓް ބުނެފައިވަނީ ގިނަ ބަޔަކަށް ހީވެފައިވާ ގޮތާ ހިލާފަށް އެ ލަކުޑިގަނޑަކީ ދޮރެއް ވެސް ނޫން ކަމަށާއި ސިޑިއަކުން ނުވަތަ ބޯޓުގެ އެހެންތަނަކުން ނެއްޓުނު ފިލާގަނޑެއް ކަމަށާއި އޭގައި އެ ދެމީހުންގެ ބަރު ހިފަހައްޓާހާ ވަރު ނުހުންނާނެ ކަމަށެވެ.

ހަގީގީ ހާދިސާއެއް ކަމަށްވާ "ޓައިޓޭނިކް"ގެ މައްޗަށް ބިނާކޮށް އުފައްދާފައިވާ އެ ފިލްމަކީ ހޮލީވުޑްގެ ތާރީހުގައި އުފެއްދި އެންމެ ކާމިޔާބު އެއް ފިލްމެވެ.