އިޒްރޭލުން ފަލަސްތީނުގެ ޣައްޒާގައި ނަސްލުނައްތާލުމަށް ހިންގަމުން އަންނަ ޖަރީމާތަކުގެ ތެރެއިން ޣައްޒާގައި މިވަގުތު ސަލާމަތުން ހުރި ހަމައެކަނި ހޮސްޕިޓަލް، ކަމަލް އަދުވާން ހޮސްޕިޓަލްގެ އެންމެ ޑޮކްޓަރެއް ފިޔަވާ ހުރިހާ ޑޮކްޓަރުން ހައްޔަރުކޮށްފި އެވެ.

އިޒްރޭލުން ފާއިތުވި ހަފްތާގައި ކަމަލް އަދުވާން ހޮސްޕިޓަލަށް ހަމަލާތަކެއް ދިނުމަށްފަހު، އެތާންގައި މަސައްކަތް ކުރަމުން ދިޔަ 100 އަށް ވުރެ ގިނަ ޑޮކްޓަރުންނާއި މެޑިކަލް އޮފިސަރުންނަކީ ޓެރަރިސްޓުން ކަމަށްބުނެ ވަނީ ހައްޔަރުކޮށްފަ އެވެ.

ޣައްޒާގެ ހެލްތު މިނިސްޓްރީގެ ތަރުޖަމާނު ވީޑިއޯ މެސެޖެއްގައި އިއްޔެ ބުނީ މިހާރު ހޮސްޕިޓަލްގައި ބަލި މީހުނަށް ފަރުވާ ދިނުމަށް ހުރީ އެންމެ ޑޮކްޓަރެއް ކަމަށެވެ. މިކަމާއި ގުޅިގެން އޭނާ ވަނީ ބައިނަލްއަގްވާމީ ޖަމާއަތްތަކުން ޣައްޒާއަށް މެޑިކަލް ސްޓާފުން ފޮނުވުމަށް އެދިފަ އެވެ. އޭނާ ބުނީ ޒަހަމްވެގެން ގެންނަ މީހުނަށްވެސް ރަނގަޅު ފަރުވާ ނުދެވި، ލޭ ހުސްވެ މަރުވަމުން ދާކަމަށެވެ.

ހޯމަ ދުވަހު އިޒްރޭލުން ބުނެފައިވަނީ އެ ހޮސްޕިޓަލުން 100 ޓެރަރިސްޓުން ހައްޔަރުކޮށްފައިވާ ކަމަށެވެ. އިޒްރޭލުން ތުހުމަތު ކުރަނީ އެ ހޮސްޕިޓަލާއި ޖަބާލިޔާ ރެފިއުޖީ ކޭމްޕްތަކުގެ ހަމާސްގެ ހަނގުރާމަވެރިން ހިމާޔަތް ހޯދަމުން ދާކަމަށެވެ.

އިޒްރޭލުން ކަމަލް އަދުވާން ހޮސްޕިޓަލަށް ހަމަލާ ދީ އެތާންގެ ގިނަ ހިދުމަތްތަކެއް ހުއްޓުމަކަށް ވަނީ ގެނެސްފަ އެވެ. އެގޮތުން އައިސީޔޫ އާއި އޮކްސިޖަން ސްޓޭޝަން އަދި އެހެނިހެން ގިނަ ވަސީލަތްތައްވެސް ވަނީ ހަލާކުކޮށްލާފަ އެވެ.

ހޮސްޕިޓަލްގައި އެޑްމިޓްކޮށްފައި ތިބި ބަލިމީހުނާއެކު އެތަނުގެ އެތައް މުވައްޒަފުންނެއްވެސް ވަނީ އަނިޔާކޮށް ހައްޔަރުކޮށްފަ އެވެ. މީގެ ތެރެއިން 30 އަށްވުރެ ގިނަ މެޑިކަލް ސްޓާފުންނަށް ވީނުވީއެއް ނޭނގޭކަމަށް ޣައްޒާގެ ހެލްތު މިނިސްޓްރީގެ ތަރުޖަމާނު ބުނެފައިވެ އެވެ.

އިޒްރޭލުން ޣައްޒާއަށް ހަމަލާދޭތާ އަހަރަކަށްވުރެ ގިނަ ދުވަސް ވެފައިވާއިރު، މިހާތަނަށް ބައިލައްކަ އާއި ގާތްކުރާ އަދަދަކަށް މީހުން ޝަހީދުކޮށްލާފައިވެ އެވެ. ޣައްޒާގައި ހާލުގައި ޖެހި ކާބޯތަކެއްޗާއި، ފެން ނުލިބި އެތައް ބަޔަކު ދަނީ ބަނޑުހައިހޫނުކަމުގައިވެސް މަރުވަމުންނެވެ. އިޒްރޭލުން ދަނީ ޣައްޒާއަށް ފޮނުވާ އިންސާނީ އެހީގެ ތަކެތި ފޯރުކޮށްދިނުމަށްވެސް ހުރަސް އަޅަމުންނެވެ.