ރިޔާސީ ދައުރު ފެށޭ ދުވަހަކީ ނޮވެމްބަރު މަހުގެ 11 ވަނަ ދުވަސް ކަމަށް އަލުން ކަނޑައަޅަން ގާނޫނުއަސާސީއަށް އިސްލާހު ހުށަހަޅަން ނިންމާފައިވާ ކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެ އެވެ.

ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި އުޝާމް ވިދާޅުވީ ރިޔާސީ ދުވަސް ފެށޭނީ ނޮވެމްބަރު 11 ވަނަ ދުވަހު ކަމަށް ކަނޑައަޅަން ގާނޫނުއަސާސީއަށް އިސްލާހު ހުށަހަޅަން ނިންމާފައިވާކަމަށެވެ. އެ އިސްލާހަކީ ރައްޔިތުންގެ ވޯޓަކަށް ދާން ޖެހޭނެ އިސްލާހެއް ކަން ވެސް އުޝާމް ފާހަގަ ކުރެއްވި އެވެ.

މި ދުވަހަކީ ރާއްޖޭގެ ޖުމްހޫރީ ދުވަހުގެ އިތުރުން އާ ރައީސް ހުވާ ކުރައްވައި، ރިޔާސީ ދައުރު ފެށޭ ދުވަހެވެ. ނަމަވެސް 2013 ވަނަ އަހަރު ރިޔާސީ އިންތިހާބުގެ ފުރަތަމަ ބުރު ސުޕްރީމް ކޯޓުން ބާތިލު ކުރުމާއެކު ނޮވެމްބަރު 11 ފާއިތުވެ ގޮސް، ކުރީގެ ރައީސް އަބްދުﷲ ޔާމީންގެ ވެރިކަން ފެށުނީ ނޮވެމްބަރު 17 ވަނަ ދުވަހު އެވެ. އޭގެ ފަހުން ރިޔާސީ ދައުރު ފެށެނީ ނޮވެމްބަރު މަހުގެ 17 ވަނަ ދުވަހުން ފެށިގެންނެވެ.

އޭގެ ފަހުން އައި ދެދައުރުގައި ރައީސް އިބްރާހީމް މުހައްމަދު ސޯލިހް އާއި ރައީސް މުހައްމަދު މުއިއްޒު ވެސް ވެރިކަމުގެ ހުވާ ކުރެއްވީ ނޮވެމްބަރު މަހުގެ 17 ވަނަ ދުވަހު އެވެ.