"ކިންގް އޮފް ރޮމޭންސް"ގެ ނަމުން މަޝްހޫރު ވެފައިވާ ބޮލީވުޑްގެ އެކްޓަރު ޝާހްރުކް ޚާންއަށް އިއްޔެ 59 އަހަރު ފުރިފައިވާއިރު އަދިވެސް އޭނާއަކީ ބޮލީވުޑްގެ އެންމެ ފުންނާބު އުސް ތަރިންގެ ތެރޭގައި ހިމެނޭ ތަރި އެކެވެ.

1992 ވަނަ އަހަރު ބޮލީވުޑަށް ތައާރަފްވި ޝާހްރުކް ޚާން ވަނީ ފާއިތުވި 32 އަހަރު ދުވަހުގެ ތެރޭގައި ކާމިޔާބު ގިނަ ފިލްމުތަކެއްގައި ފެނިގެން ގޮސްފަ އެވެ.

ޝާހްރުކް ޚާންއަކީ ބޮލީވުޑްގައި ލޯބީގެ ފިލްމުތައް އެންމެ މޮޅަށް ކުޅޭ އެކްޓަރުގެ ގޮތުގައި ގިނަ ބަޔަކު ފާހަގަކުރެ އެވެ. ޝާހްރުކް ޚާންގެ ގިނަ ފިލްމުތަކަކީ ވެސް ލޯބީގެ ފިލްމުތަކެވެ.

އެގޮތުން އޭނާގެ ފާހަގަ ކޮށްލެވޭ ފިލްމުތަކުގެ ތެރޭގައި "ދިލްވާލޭ ދުލްހަނިޔާ ލޭޖަޔޭންގޭ"، "ކަބީ ޚުޝީ ކަބީ ގަމް" އަދި "ކުޗް ކުޗް ހޯތާހޭ" ފަދަ ފިލްމުތައް ވެސް ހިމެނެ އެވެ.

އެހެން ނަމަވެސް މި ފަހަކަށް އައިސް ޝާހްރުކް ވަނީ އޭނާ ކުޅޭ ފިލްމުތަކުގެ ވައްޓަފާޅި މުޅިން ބަދަލުކޮށްފަ އެވެ. އެގޮތުން އޭނާގެ އެންމެ ފަހުގެ ފިލްމުތައް ކަމަށްވާ "ޖަވާން"އާއި "ޕަތާން" ފަދަ ފިލްމުތަކަކީ އެކްޝަން ފިލްމުތަކެވެ.

އިންޑިއާގެ އިތުރުން މުޅި ދުނިޔޭގައި ވެސް ޝާހްރުކް ޚާންއަކީ މަގްބޫލު އެކްޓަރަކަށްވާއިރު އޭނާއަށް ސަޕޯޓުކުރާ އެތައް މިލިއަން ބަޔަކު ދުނިޔޭގެ އެކި ކަންކޮޅުތަކުގައި އުޅެ އެވެ.

އުމުރުން 59 އަހަރުވާއިރު ބޮލީވުޑްގެ ގިނަ ތަރިން އެމީހުންގެ މަސައްކަތްތަކުން އަތް ދޫކޮށްލި ނަމަވެސް ޝާހްރުކް ޚާން އަދިވެސް އަންނަނީ އޭނާގެ މަސައްކަތް ކުރިއަށް ގެންދަމުންނެވެ.

އެގޮތުން އޭނާ ދެން އެންމެ އަވަހަށް ފެންނާނީ އޭނާގެ ދަރިފުޅު ސުހާނާ ޚާންއާއެކު ފިލްމު "ކިންގް"އިން ކަމަށް ހަބަރުތައް ބުނެ އެވެ.