ބޮލީވުޑްގައި ބޮޑު މަގުބޫލު ކަމެއް ލިބިގެންދިޔަ ފިލްމު "ވީރުޒާރާ" އަށް 20 އަހަރު ފުރުން ފާހަގަ ކުރުމުގެ ގޮތުން އަލުން ސިނަމާތަކުގައި ދައްކަން ފަށައިފި އެވެ.

ނޮވެމްބަރު 12، 2004 ގައި ރިލީޒްކުރި މިފިލްމުގައި ލީޑު ރޯލުން ފެނިގެންދަނީ ބޮލީވުޑްގެ މަޝްހޫރު އެކްޓަރު ޝާހްރުކް ޚާން އާއި ބަތަލާ ޕްރިތީ ޒިންތާ އެވެ.

ލޯބީގެ އަސަރުގަދަ ފިލްމު "ވީރް ޒާރާ" އަކީ އެ އަހަރު އެންމެ ބޮޑު އާމްދަނީއެއް ވެސް ހޯދި ބޮލީވުޑްގެ ފިލްމެވެ. އެގޮތުން 23 ކްރޯޑް ރުޕީސްގެ ބަޖެޓަކުން ހެދި މި ފިލްމަށް ވަނީ ބޮކްސް އޮފީހުގައި 98 ކްރޯޑް ރުޕީސް ލިބިފަ އެވެ.

ޔާޝް ރާޖް ފިލްމްސްއިން އުފެއްދި މިފިލްމުގެ ޑައިރެކްޓަރަކީ ޔާޝް ޗޯޕްރާ އެވެ. މި ފިލްމުގެ ސްކްރީން ޕްލޭ ލިޔެފައި ވަނީ އޭނާގެ ދަރިފުޅު އަދިތިޔާ ޗޯޕްރާ އެވެ.

ޔާސް ރާޖް ފިލްމްސްއިން ބުނީ "ވީރް ޒާރާ" އަށް 20 އަހަރު ފުރުން ފާހަގަ ކުރުމުގެ ގޮތުން މިފިލްމު ދުނިޔޭގެ އެކި ގައުމުތައް ހިމެނޭ ގޮތަށް 600 ސިނަމާގައި މި ފިލްމު އަލުން ރިލީޒް ކުރުމަށް ހަމަޖެހިފައިވާ ކަމަށެވެ.

https://www.youtube.com/watch?v=OSaVImLnnsw&t=2s

ޝާހް އާއި ޕްރިތީގެ އިތުރުން މިފިލްމުގައި ރާނީ މުކަރްޖީ، އަމިތާބް ބައްޗަން، ހެމާ މާލިނީ، ދިވިޔާ ދައްތާ، ބޯމަން އިރާނީ، ކިރޮން ކެރް، އަނުޕަމް ކެރް، މަނޯޖް ބާޖްޕާއީ، އަދި ޒޮހްރާ ސެހްގަލް ވެސް މުހިންމު ރޯލުތަކުން ފެނެ އެވެ.

މި ފިލްމުގައި ދައްކަނީ އިންޑިއާގެ ސިފައިންގެ ތެރޭގައި މަސައްކަތްކުރާ މީހަކާއި ޕާކިސްތާނުގެ ސިޔާސީ މީހެއްގެ އަންހެން ދަރިއަކާ މެދުގައި ލޯބީގެ ގުޅުމެއް އުފެދޭ ހިސާބުން ހިނގާ ކަންތައްތަކެވެ.