ރައީސް އިބްރާހިމް މުހައްމަދު ސޯލިހުގެ ސަރުކާރުން "ގެދޮރުވެރިޔާ" ސްކީމުގެ ދަށުން ހުޅުމާލޭ ދެވަނަ ފިޔަވަހީގައި އިމާރާތްކުރާ 4،000 ފުލެޓު ލިބޭ މީހުންގެ ލިސްޓް މި ސަރުކާރަށް އާންމުނުކުރެވި އަހަރަކާއި ގާތްވެފައިވަނިކޮށް، އަންނަ ހަފްތާގައި ވަގުތީ ލިސްޓް އާންމުކޮށް ޝަކުވާއަށް ހުޅުވާލާނެކަމަށް ހައުސިން މިނިސްޓަރު އަލީ ހައިދަރު ވިދާޅުވެއްޖެ އެވެ.

ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަފުޅުދައްކަވަމުން ހައިދަރު ވިދާޅުވީ 4000 ފުލެޓަށް އެދި ހުށައަޅާފައިވާ ފޯމްތައް އަލުން އިވެލުއޭޓް ކުރުމުގެ މަސައްކަތްތައް ކުރަމުން އަންނަކަމަށެވެ. އަދި އެހުރިހާ ފޯމެއް އިވެލުއޭޓްކޮށް ނިމުމުން އަންނަ ހަފުތާ ތެރޭގައި 4000 ފުލެޓް ލިބޭ މީހުންގެ ވަގުތީ ލިސްޓް އިއުލާންކުރާނެ ކަމަށް އޭނާ ވިދާޅުވި އެވެ. އެއަށްފަހު އެ ލިސްޓަށް ޝަކުވާ ހުށައެޅުމުގެ ފުރުސަތު ވެސް ހުޅުވާލާނެ ކަމަށް ވިދާޅުވި އެވެ.

މާލެ ސަރަހައްދުން ފްލެޓް ދޫކުރުމަށް 26 ޖޫން 2022 ގައި ފަށާފައިވާ "ގެދޮރުވެރިޔާ" ސްކީމްގެ ދަށުން 15 ނޮވެމްބަރު 2023 ގައި އިއުލާނުކުރި ފްލެޓް ލިބޭ ފަރާތްތަކުގެ ދާއިމީ ލިސްޓް އެކުލަވައިލުމުގައި ކޮރަޕްޝަނަށް މަގުފަހިވާ ކަންތައްތަކެއް ހުރިކަމަށް ތުހުމަތުކޮށް، އާންމު ފަރާތްތަކުން އެންޓި ކޮރަޕްޝަން ކޮމިޝަނަށް ހުށަހަޅާފައިވާ މައްސަލައާއި ގުޅިގެން އަލުން ލިސްޓުތައް މުރާޖާއާކުރުމަށް ހައުސިން މިނިސްޓްރީން ފެށި އެވެ.

ހައުސިން މިނިސްޓްރީން އެކި ފަހަރު މަތިން ފްލެޓް ލިސްޓު އާންމުކުރުން ފަސްކޮށްފައިވާއިރު، މިދިޔަ ޖުލައި މަހުން ފެށިގެން ފްލެޓް ލިސްޓް އާއްމުކުރަނީ އޮކްޓޯބަރު މަހުގައި ކަމަށް ހާމަކުރުމަށްފަހު، އޮކްޓޯބަރު މަސް ނިމެން ކައިރިވުމުން އަނެއްކާވެސް އެ ތާރީހު ވަނީ ނޮވެމްބަރަށް ބަދަލުކޮށްފަ އެވެ.

އޮކްޓޯބަރު މަހު މިނިސްޓްރީން ބުނީ ސްކީމްގެ ދަށުން ހުށަހަޅާފައިވާ ހުރިހާ އެޕްލިކޭޝަން ފޯމުތައް ރީ- އިވެލުއޭޓްކުރުމުގެ މަސައްކަތްތައް ފުރިހަމައަށް ނިންމާލުމަށް އިތުރު ވަގުތު ބޭނުންވާތީ، މި އަހަރުގެ ނޮވެމްބަރު މަހުގެ ދެވަނަ ހަފްތާގެ ނިޔަލަށް ވަގުތީ ލިސްޓް އާންމު ކުރުމުގެ މަސައްކަތްތައް މިނިސްޓްރީއިން ކުރަމުންދާނެ ކަމަށެވެ.