ސިވިލް ސާވިސް ކޮމިޝަންގެ ރައީސް އާއި އިލެކްޝަންސް ކޮމިޝަންގެ ނައިބު ރައީސް، އަދި އެންޓިކޮރަޕްޝަން ކޮމިޝަންގެ ނައިބު ރައީސް އާއި އެ ތިން ކޮމިޝަންގެ ބައެއް މެންބަރުން ވަކި ކުރުމުގެ މައްސަލަ މާދަމާގެ މަޖިލިސް ޖަލްސާއަށް އެޖެންޑާކޮށްފި އެވެ.

މާދަމާގެ ޖަލްސާއަށް މަޖިލީހުގެ ރައީސްގެ މޭޒުން ހުށަހަޅާ ކަންކަމުގެ ތެރޭގައި ހިމަނާފައިވާ އެއް ކަމަކީ އެންޓި ކޮރަޕްޝަން ކޮމިޝަންގެ ނައިބުރައީސް އާއި މެންބަރަކު، އެ ކޮމިޝަންގެ މެންބަރުކަމުން ވަކި ކުރުމުގެ މައްސަލަ، ރައްޔިތުންގެ މަޖިލީހުގެ ގަވާއިދުގެ 232 ވަނަ މާއްދާގެ (ށ)ގައިވާގޮތުގެ މަތިން އެ މައްސަލަ ދާއިމީ ކޮމިޓީއަށް ފޮނުވުމެވެ.

މީގެ އިތުރުން ސިވިލް ސާވިސް ކޮމިޝަންގެ ރައީސް އެ ކޮމިޝަންގެ މެންބަރުކަމުގެ މަގާމުން ވަކިކުރުމުމުގެ މައްސަލަ އާއި އިލެކްޝަންސް ކޮމިޝަންގެ ނައިބު ރައީސްއާއި ދެ މެންބަރުން އެ ކޮމިޝަންގެ މެންބަރުކަމުގެ މަގާމުން ވަކިކުރުމުގެ މައްސަލަ ހުށަހެޅުންވެސް ވަނީ ތާވަލުކޮށްފަ އެވެ.

އެޖެންޑާގައިވާ ގޮތުން މަގާމުން ވަކިކުރަން ހުށަހަޅަނީ ސީއެސްސީގެ ރައީސް މުހައްމަދު ނާސިހާއި އޭސީސީގެ ނައިބު ރައީސް އަބްދުއްސަލާމާއި އެ ކޮމިޝަންގެ އިތުރު މެމްބަރަކާއި އީސީގެ ނައިބު ރައީސް އަލީ ނަޝާތާއި އެ ކޮމިޝަންގެ އިތުރު ދެ މެންބަރެކެވެ.

އެނގިފައިވާ ގޮތުގައި އޭސީސީގެ ނައިބު ރައީސް ސަލާމްގެ އިތުރުން ވަކިކުރަން ހުށަހަޅަނީ އެ ކޮމިޝަންގެ މެމްބަރު ތޯހާ މުހައްމަދެވެ. އީސީން ވަކިކުރަން ހުށަހަޅަނީ ނަޝާތުގެ އިތުރުން މެންބަރު މުހައްމަދު އާސިފާއި މެންބަރު މުހައްމަދު ޒާހިރެވެ.

ސިވިލްސާވިސް ކޮމިޝަންގެ މެމްބަރު ކަމަށް ނާސިހު އައްޔަނުކުރީ ސެޕްޓެމްބަރު 3، 2020 ގަ އެވެ. އިލެކްޝަންސް ކޮމިޝަނުގެ މެމްބަރު ކަމަށް ނަޝާތު ދެ ވަނަ ދައުރަކަށް އައްޔަނުކުރީ މިދިޔަ އަހަރުގެ ނޮވެމްބަރު 16، ގަ އެވެ. އެ ކޮމިޝަނުގެ މެމްބަރު ކަމަށް އާސިފް އައްޔަނުކުރީ ސެޕްޓެމްބަރު 6، 2021 ގަ އެވެ. އަދި އެންޓި ކޮރަޕްޝަން ކޮމިޝަނަށް ތޯހާ އައްޔަނުކުރީ މާޗު 17، 2022 ގަ އެވެ.

ތިން މިނިވަން މުއައްސަސާއެއްގެ މެންބަރުންގެ އިތުބާރު ނެތް ކަމުގެ މައްސަލަ މިނިވަން މުއައްސަސާތަކުގެ ކޮމިޓީއަށް ފާއިތުވި ހަފްތާގައި ހުށަހަޅައި މަޖިލީހުން އެ މަސައްކަތް ފަށަން ތައްޔާރުވެފައިމިވަނީ، އޭސީސީ އާއި އިލެކްޝަންސް ކޮމިޝަނުގެ ރައީސުން އައްޔަނުކުރުމުގެ ބާރު ރައީސުލްޖުމްހޫރިއްޔާ ދޭ ގޮތަށް ގާނޫނުތައް ބަދަލުކުރަން އުޅޭ ދަނޑިވަޅެއްގަ އެވެ.