އައިޖީއެމްއެޗްގައި މަސައްކަތްކުރި މޭރީ ގްރޭސްގެ މަރާލި މައްސަލާގައި ޝަރީއަތް ނިމެންދެން ބަންދުކޮށްފައިވާ ހަލީމަތު ލަމްހާ އަނެއްކާވެސް ބަންދުން ދޫކޮށްލަަން ކްރިމިނަލް ކޯޓުން އަންގައިފި އެވެ.

އޮކްޓޫބަރު، 2021 ގައި މޭރީގެ ފިރިމީހާ މާވިން އެސްވައިއާ ދެ މީހުން ބައިވެރިވެގެން މޭރީ މަރާލި ކަމަށް ބުނާ މައްސަލާގައި ލަމްހާގެ މައްޗަށް ކުރަނީ އެކަމުގައި ބައިވެރިވުމުގެ ދައުވާ އެވެ. އަދި އައިޖީއެމްއެޗް ހޮސްޕިޓަލުން މަނާ ބޭސްތަކެއް ހުއްދަ ނެތި ގެންދިއުމުގެ ދައުވާ ވެސް ލަމްހާއަށް ކުރެ އެވެ.

ކްރިމިނަލް ކޯޓުން މިއަދު އޭނާ ދޫކޮށްލަން ނިންމީ ޝަރީއަތް ލަސްވެފައިވާތީ އޭނާގެ ފަރާތުން މިދިޔަ ހަފުތާގައި އެގޮތަށް އެދުމުންނެވެ. އޭނާ ދޫކޮށްލީ މާލެއިން ބޭރަށް ނުދިއުމަށާއި ވަކި ވަގުތުތަކެއްގައި ގެއިން ބޭރަށް ނުނިކުތުމުގެ އިތުރުން ކޯޓުން އަންގާ ގަޑިއަށް ކޯޓަށް ހާޒިރުވުމަށް ޝަރުތުކޮށެވެ.

ލަމްހާ ބަންދުން ދޫކޮށްލަން މިދިޔަ އަހަރު ވެސް ކްރިމިނަލް ކޯޓުން އެންގި އެވެ. އެގޮތަށް އަމުރު ކުރުމުން ހައި ކޯޓުން އޭރު ވަނީ އެ ނިންމުން ބާތިލްކޮށް، ލަމްހާ އަލުން ބަންދުކުރަން އަމުރުކޮށްފަ އެވެ.

ލަމްހާ ދޫކޮށްލި ނަމަވެސް، އެ މައްސަލާގެ ތުހުމަތު ކުރެވޭ މާވިން އަދިވެސް ހުރީ ބަންދުގަ އެވެ.