ވެރިކަން ކުރާ ޕީޕަލްސް ނެޝަނަލް ކޮންގްރެސް ޕާޓީ (ޕީއެންސީ)ގެ އެތެރޭގެ އިންތިހާބު ވަކި ބަޔަކު ބޭނުންގޮތަކަށް ކުރިއަށް ގެންދިއުމަށް އޮޅުވާލައި އާންމުކުރި ލިސްޓް، މެންބަރުންގެ ޝަކުވާ ބޮޑުވުމުން ބާތިލުކޮށްފި އެވެ.

އެ ޕާޓީގެ ބައެއް މެންބަރުން ބުނިގޮތުގައި އިއްޔެ އާންމުކުރި ލިސްޓްގައި އިންތިހާބަށް ކުރިމަތިލި ބައެއް މީހުންގެ ނަން ލިސްޓުގައި ނުހިމަނާކަމަށާއި އަދި އިންތިހާބުގައި ވާދަކުރަން ފޯމް ނުލާ ބައެއްގެ ނަން ލިސްޓުގައި ހިމަނާފައިވާ ކަމަށެވެ.

މައްސަލަ ބޮޑުވެ ރޭގެ ވަގުތެއްގައި ޕީއެންސީން ވަނީ ބަޔާނެއް ނެރެ، ލިސްޓްގައި ކޮންމެވެސް ވަރަކަށް އިދާރީ މައްސަލަ ހުރިކަމަށް ބުނެ ލިސްޓު ބާތިލުކޮށްފަ އެވެ.

"އެ ލިސްޓު މުރާޖައާކޮށް، ޝަރުތުތަކާއި އިޖުރާއަތު ފުރިހަމަވާ ކެންޑިޑޭޓުންގެ ފުރިހަމަ ލިސްޓެއް ނޮވެމްބަރު 16 ވަނަ ދުވަހުގެ ކުރިން އާންމު ކުރާނެވާހަކަ ދަންނަވަން" އެ ޕާޓީންގެ ނޫސް ބަޔާނުގައި ބުނެފައިވެ އެވެ.

"ހުރިހާ" އާ ވާހަކަ ދައްކަމުން ޕީއެންސީ މެންބަރަކު ބުނީ ލިސްޓް ގަޑުބަޑުކޮށް އޮޅުވާލުމަށް މަސައްކަތް ކުރުމުން މެންބަރުން ނުރުހުން ފާޅުކުރަން ފެށުމުން އެއީ "އިދާރީ އޮޅުމެއް" ކަމަށް ބުނެ، ލިސްޓް ބާތިލުކޮށްފައިވާ ކަމަށެވެ.

"ކޮންމެ ކަމެއްގައި އޮންނަނީ ހުދުމުހުތާރުކަން، ޕާޓީވެސް ހިންގަނީ ވަކި މީހަކަށް މަންފާ ވާގޮތަށް އެއްވެސް އަސާސަކަށް ގަވައިދަކަށް ބެލުމެއްނެތި" އޭނާ ބުންޏެވެ.

އެގޮތުން މާފަންނު އުތުރު ދާއިރާ ރައީސް ކަމަށް ކުރިމަތިލި އިސްމާއިލް އަބްދުއްރަހީމްގެ ނަން އިއުލާނު ކުރި ކެންޑިޑޭޓުންގެ ލިސްޓުން އުނިކޮށް، އެ ދާއިރާއަށް ކުރިމަތިލިކަމަށް ލިސްޓުގައި ވަނީ ހަމައެކަނި ރައީސް އޮފީހުގެ މިނިސްޓަރު، އަދި ރައީސްގެ އާއިލީ ބޭފުޅެއްކަމަށްވާ އަލީ އާރިފްގެ ނަން އެކަންޏެވެ.

ޕީއެންސީތެރޭގައި މިފަދަ އެތައް އޮޅުވާލުންތަކާއެކު، ޕާޓީގެ ގިނަ މެންބަރުންތަކެއް ދަނީ ނުރުހުން ފާޅުކުރަމުންނެވެ.