ސަރުކާރުން ކުއްލި ގޮތަކަށް ގާނޫނުއަސާސީއަށް އެއް ދުވަސް ތެރޭގައި ގެނައި ބަދަލުތަކާއި ގުޅިގެން އެގާރަ ޖަމިއްޔާއަކުން ކަންބޮޑުވުން ފާޅުކޮށްފި އެވެ.

ކަންބޮޑުވުން ފާޅުކޮށްފައިވަނީ ޓްރާންސްޕޭރެންސީ މޯލްޑިވްސް، ސޭވް މޯލްޑިވްސް، އެސޯސިއޭޝަން ފޯ ޑެމޮކްރަސީ އިން ދަ މޯލްޑިވްސް، އުތެމާ، އީކުއެލް ރައިޓް އިނީޝިއޭޓިވް، ޒީރޯ ވޭސްޓް މޯލްޑިވްސް، މޯލްޑިވްސް ލޯކަލް ކައުންސިލް އެސޯސިއޭޝަން، ހޯޕް ފޯ ވިމެން، ޕްރޮޓެކްޓް ތިމާވެށި، ބިލީފް މޯލްޑިވްސް އަދި އިކޯކެއާ މޯލްޑިވްސް އިންނެވެ.

ޖަމިއްޔާތަކުން މިއަދު ނެރުނު ނޫސްބަޔާނެއްގައި ބުނެފައިވަނީ ގާނޫނު އަސާސީއަށް ގެނައި ބަދަލުތަކަކީ އިސްލާހު ކުރުމުގައި އެއްވެސް ހާމަކަމެއް ނެތި އަވަސް އަރުވާލުމާއި، ގާނޫނުތައް ހެދުމުގައި ގެންގުޅެންޖެހޭ އިޖުރާއަތްތަކާއި، އުސޫލުތަކަށް ބެލުމެއްނެތި ޑިމޮކްރެޓިކް ހަމަތައް ހަނިކުރުމަށް ބާރުއެޅޭފަދަ ގޮތަކަށް ކޮށްފައިވާ މައްސަކަތެއްކަމަށް ދެކޭކަމަށެވެ.

ދިވެހި ދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިން ކަމަށާއި އެ ބާރުތައް ދެމި އޮންނަނީ ރައްޔިތުންގެ ކިބައިގައި ކަމަށް ގާނޫނުއަސާސީގެ 4 ވަނަ މާއްދާގައި ބުނާއިރު، މި ބަދަލުތައް އެ މާއްދާއާ ހިލާފު ކަމަށްވެސް ބަޔާނުގައި ބުނެފައިވެ އެވެ.

"ރޭގަނޑު ނުރަސްމީ ގަޑިއެއްގައި ބިލު ހުށަހަޅައި، އޭގެ އަނެއް ދުވަހު ބިލު ފާސްކޮށް ތަސްދީގުކުރުމަކީ ރައްޔިތުންގެ މަޖިލީހުގެ މެންބަރުންނަށް ބިލު ދިރާސާކޮށް، ބިލާއި މެދު އިލްމީ ބަހުސްއެއް ކުރުމަށާއި މެންބަރުންގެ ޒިންމާ އެންމެ ފުރިހަމަ ގޮތުގައި އަދާ ކުރުމަށް ހުރަސް އެޅުން" ބަޔާނުގައިވެ އެވެ.

ގާނޫނުއަސާސީއަށް ގެނެވޭ ބަދަލަކާއި ގުޅިގެން ހިޔާލު ހުށަހެޅުމުގެ ފުރުސަތު މަދަނީ ޖަމިއްޔާތަކަށާއި ރައްޔިތުންނަށް ނުލިބުމަކީ ޑިމޮކްރެޓިކް އުސޫލުތަކުގެ ދަށުން ހިޔާލު ބަދަލު ކުރުމަށް ހުރަސް އެޅިގެން ދިޔަ ކަމެއް ގޮތުގައި އެ ޖަމިއްޔާތަކުން ފާހަގަކުރި އެވެ.

އޭގެއިތުރުން ރައީސުލްޖުމްހޫރިއްޔާއަށް ލިބިދޭ ބާރުތަކާއި މަސްއޫލިއްޔަތުތަކަށް ގެނެވުނު އިސްލާހަކީ ވެސް ކަންބޮޑުވާ އިސްލާހެއްކަން އެ ބަޔާނުގައި ވަނީ ބުނެފަ އެވެ. އެގޮތުން އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނު އިސްލާހު ތަސްދީގު ކުރުމުގެ ކުރިން، ތަރައްގީގެ ޕްލޭން އެކުލަވައިލުމުގައި ކައުންސިލްތަކުގެ ދައުރު ލާޒިމް ކުރެވިފައި ވަނީ ލާމަރުކަޒީ އުސޫލުން ގިނަ ރައްޔިތުންގެ ބައިވެރިވުމާއި މަޝްވަރާއާ އެކު ތަރައްގީގެ ކަންކަން ނިންމުމަށް ކަމަށް ފާހަގަކޮށްފައިވެ އެވެ.

އެހެންކަމުން ރައީސުލްޖުމްހޫރިއްޔާއަށް އެކަނި ގައުމީ ތަރައްގީގެ ސިޔާސަތުތަކާއި ޕްލޭންތައް އެކުލަވާލުމުގެ ފުރިހަމަ ބާރު ލިބިގެން ދިޔުމަކީ ޑިމޮކްރެޓިކް އުސޫލުތަކުން ބާރުއަޅާ ބާރުތައް ވަކި ކުރުމުގެ އުސޫލުތަކާއި އެކި ސަރުކާރުތަކުން ކުރެވިފައިވާ މުހިންމު މަސައްކަތްތަކާއި ދުރަށް ދިއުން ކަމަށް ޖަމިއްޔާތަކުން ދެކެ އެވެ.

މީގެ އިތުރުން މަޖިލިސް މެންބަރުންގެ ގޮނޑި ގެއްލޭ އިސްލާހާއި ގުޅިގެން ކަންބޮޑުވުން ފާޅުކޮށް ޖަމިއްޔާތަކުން ބުނީ މިނިވަން މެންބަރަކު ސިޔާސީ ޕާޓީއަކާ ގުޅިއްޖެނަމަ އެ މެންބަރެއްގެ ގޮނޑި ގެއްލޭނެ ކަމަށް އެ ގާނޫނުގައިވާ ކަމަށެވެ.

އެހެންކަމުން މި މާއްދާތަކުގެ ސަބަބުން މަންދޫބުން އިހުތިޔާރު ކުރުމުގެ މައިގަނޑު ޑިމޮކްރެޓިކް އުސޫލަށް އުނިކަން އައުމާއި އެކު، ރައްޔިތުންގެ މަޖިލީހުގެ މެންބަރުންގެ ސިޔާސީ މިނިވަންކަމަށް ހުރަސް އެޅިގެންދާނެ ކަމަށެވެ.

"ސިޔާސީ ޕާޓީތަކަށް މެންބަރުން ވަކި ކުރުމުގެ ބާރު ދީފިނަމަ، އަމިއްލަ ވިސްނުނުމަށް ނުވަތަ އެ މެންބަރަކު އިންތިހާބުވީ ދާއިރާގެ މަސްލަހަތަށް ބެލުމެއް ނެތި، އެ ޕާޓީން ތާއީދުކުރާ ކޮންމެ ކަމަކަށް ވޯޓުދޭން މެންބަރުންނަށް މަޖުބޫރުވާނެ،" އެ ޖަމިއްޔާތަކުން ބުންޏެވެ.

ޖަމިއްޔާތަކުން ބުނީ ގާނޫނު ހެދުމުގެ މަރުހަލާތައް ރައްކާތެރި ކުރުމުގެ ގޮތުން އެކުލަވާލާފައިވާ އިޖުރާއަތްތަކުގެ ބޭރުން ގާނޫނު ހެދުމުގެ މަސައްކަތްތައް ކުރުމަކީ ގާނޫނު ހެދުމުގެ މަރުހަލާތަކުގެ ނަޒާހަތްތެރިކަން ގެއްލުވާލާ، ގާނޫނު ހަދާ މަޖިލީހަށާއި ހިންގުމުގެ ނިޒާމަށް އޮންނަ އިތުބާރު ކުޑަވާނެ ކަމެއް ކަމަށެވެ.

ގާނޫނުތައް ބަދަލު ކުރުމުގައި ޑިމޮކްރެޓިކް އުސޫލުތަކާއި ގާނޫނީ ހަމަތައް ރައްކާތެރި ކުރުމަށް ޖަމިއްޔާތަކުން ގޮވާލާފައިވެ އެވެ.

ދައުލަތުން މުހިންމު ދެ ބާރު ކަމުގައިވާ ގާނޫނު ހަދާ މަޖިލީހާއި ސަރުކާރުން ގާނޫނު އަސާސީ އާއި އެހެނިހެން މުހިންމު ގާނޫނުތައް އިސްލާހު ކުރުމުގައި ނުވަތަ އެކުލަވާލުމުގައި މައުނަވީ ގޮތެއްގައި ރައްޔިތުންގެ ރައުޔު ހޯދުމަށާއި ބައިވެރިވުން ކަށަވަރުކޮށް ހާމަކަމާއި ޖާވަބުދާރީ ކުރުވޭނެ ފަދަ ގޮތަކަށް މަސައްކަތް ކުރުމަށްވެސް ޖަމިއްޔާތަކުން ވަނީ ގޮވާލާފަ އެވެ.