"ގާނޫނު އަސާސީއަށް މި ގެނެވުނު ބަދަލުގެ ސަބަބުން ރައްޔިތުންގެ މަޖިލިސްގެ މެންބަރުން، ޕާޓީގެ މުށު ތެރޭގައި ތާށިވީ އެވެ. ލީޑަރު ނުރުހޭ ގޮތަކަށް އަމަލުކޮށްފިނަމަ، ނުވަތަ ޚިޔާލު ތަފާތުވެއްޖެނަމަ، ނުވަތަ ވޯޓު ދީފިނަމަ ޕާޓީން ވަކިކޮށްލުމުން މަޖިލިސްގެ މެންބަރުކަން ގެއްލިދާނެ އެވެ."

އަވަސް އަރުވާލައިގެން ގާނޫނު އަސާސީ ބަދަލުކޮށް ރައްޔިތުންގެ މަޖިލީހުގެ މެންބަރުންނަށް ޕާޓީ ބަދަލުނުކުރެވޭ ގޮތަށް ހެދުމާ ވިދިގެން ކުރީގެ ހޯމް މިނިސްޓަރު އުމަރު ނަސީރު އޭނާގެ ޚިޔާލު ފާޅު ކުރެވުމަށް ކުރެއްވި ފޭސްބްކް ޕޯސްޓް ފެށްޓެވީ މަތީގައި އެވާ އިބާރާތުންނެވެ. އެ މޭރުމުން ވާހަކަދެއްކެވި ހަމަ އެކަނި ބޭފުޅަކީ އުމަރެއް ނޫނެވެ. އެއީ ރާއްޖޭގެ އާބާދީގެ ބޮޑު ބަޔަކު ކަންބޮޑުވެ ޚިޔާލު ފާޅުކުރި މައްސަލައެކެވެ.

ސޯޝަލް މީޑިއާގައި އެހެން ބޭފުޅަކު ޚިޔާލުފާޅުކުރެއްވި ގޮތުގައި މިހާރު ދެން ރައްޔިތުންގެ މަޖިލިސް އޮތުމުގެ ބޭނުމެއްނެތެވެ. އެ މަޖިލިސް އުވާލުމަށްފަހު ރައީސް ނިސްބަތްވާ ޕާޓީގެ ޕީޖީ ގްރޫޕަކީ ގާނޫނު ހަދާ މަޖިލިސް ކަމަށް ހަދާލުމުން އެ ނިމުނީ އެވެ.

މި ހުރިހާ ޚިޔާލުތަކަކާއެކު ވެސް ސަރުކާރަށް ތާއީދުކުރާ ފަރާތްތަކުގެ ހުއްޖަތަކީ ރައްޔިތުންގެ މަޖިލީހުގެ މެންބަރުންގެ މިނިވަންކަން ކަށަވަރު ކުރުމަށްޓަކައި އެބިލަކީ ކޮންމެހެން އޮންނަން ޖެހޭ ބިލެއް ކަމަށެވެ. ރައްޔިތުންގެ މަޖިލީހުގެ ރައީސް ވިދާޅުވީ ބިލުގެ ސަބަބުން މަޖިލީހުގެ މެންބަރުންގެ ނަޒާހަތްތެރިކަން ޔަގީންވީ އެވެ. ސުވާލަކީ މީހުންގެ ނަޒާހަތްތެރިކަމާއި އަމާނާތްތެރިކަމާއި އަޚުލާގަކީ ގަދަކަމުން ހޯދޭ އެއްޗެއްތޯ އެވެ.

އެންޓި ޑިފެކްޝަން ގާނނޫނާއި ޑިމޮކްރަސީ

އެންޓި ޑިފެކްޝަން ގާނޫނު ނުވަތަ މަޖިލިސް މެންބަރުން ޕާޓީ ބަދަލުކުރުމުން ގޮނޑި ގެއްލޭ ގާނޫނަކީ ދުނިޔޭގެ ތަހުޒީބު ޑިމޮކްރަސީތަކުގައި އޮންނަ އެއްޗެއް ނޫނެވެ. އިނގިރޭސި ވިލާތާއި ޔޫރަޕްގެ އެއްވެސް ގައުމެއްގައި އެފަދަ ގާނޫނެއް ނޯވެ އެވެ. ހަމަ އެފަދައިން ކެނެޑާ އޮސްޓްރޭލިއާ، ނިއުޒީލޭންޑު ފަދަ ގައުމުތަކުގައި ވެސް އެފަދަ ގާނޫނެއް ނޯވެ އެވެ. އެ ގައުމުތަކުގައި ބަލަނީ މެންބަރުންގެ މިނިވަންކަމަކީ ޑިމޮކްރަސީގެ އަސާސެއް ކަމަށެވެ. އެގޮތުން މަޖިލީހުގެ މެންބަރުންނަކީ ޕާޓީގެ ތަމްސީލުކުރާ ބަޔަކަށް ވުރެ ބޮޑަށް އެ މެންބަރުން ހޮވޭ ދާއިރާ ތަމްސީލުކުރާ ބަޔަކަށްވާން ޖެހޭނެ ކަމަށް އެގައުމުތަކުން ދެކެ އެވެ. ދާއިރާ ތަމްސީލުކުރުމުގެ ގޮތުން އެހެން އެއްވެސް ބާރެއްގެ ނުފޫޒެއް ނެތި މިނިވަންކަމާއެކު ޚިޔާލުފާޅުކުރުމާއި ވޯޓު ދިނުމުގެ އިޚުތިޔާރު މެންބަރުންނަށް އޮތުމަކީ ޑިމޮކްރަސީގެ އަސާސެއް ކަމަށް ވެސް އެ ގައުމުތަކުން ދެކެ އެވެ. އެހެންކަމުން މެންބަރުންގެ މިނިވަންކަމަށް ހުރަސްއެޅޭ ފަދަ ގާނޫނެއް ވުޖޫދުކުރުމުގެ ސަބަބުން ޑިމޮކްރެޓިކް އުސޫލުތަކުގެ ތެރެއިން ކަށަވަރު ވާންޖެހޭ މިނިވަންކަމަށް ހުރަސް އެޅުމަކީ ދުނިޔޭގެ ތަހުޒީބު ޑިމޮކްރަސީތަކުގައި ކޮށްއުޅޭކަމެއް ނޫނެވެ.

އެންޓި ޑިފެކްޝަން ގާނޫނު އޮންނަނީ ކޮން ގައުމުތަކެއްގައި

އިންޑިއާ، ބަންގްލަދޭޝް، ޕާކިސްތާން، މެލޭޝިއާ، ސިންގަޕޫރު ފަދަ ގައުމުތަކުގައި އެންޓި ޑިފެކްޝަން ގާނޫނު އޮވެ އެވެ. މި ގައުމުތަކަށް ބަލާއިރު މީގެ ތެރޭގައި ޑިމޮކްރެޓިކް އުސޫލުތަކުގެ މަތިން ރައްޔިތުންނަށް ލިބެންޖެހޭ މިނިވަންކަން ދީގެން ވެރިކަން ހިނގާ ގައުމެއް ނެތޭ ވެސް ބުނެވިދާނެ އެވެ. މި ގައުމުތަކަކީ ޚިޔާލު ފާޅުކުރުމުގެ މިނިވަންކަން އޭގެ ފުރިހަމަ މާނައިގައި އޮންނަ ގައުމުތަކެއް ނޫނެވެ. އޭގެ ބަދަލުގައި ރައްޔިތުންގެ މައްޗަށް ވެރިންގެ ބާރާއި ނުފޫޒު ހިންގުމުގައި މިއީ ނަމޫނާ ގައުމުތަކެކެވެ.

ރާއްޖެއަށް ކުރިމަތިވި ހާލަތު

ރައްޔިތުންގެ މަޖިލީހުގެ މެންބަރުންނަށް އެމީހުންގެ އަމިއްލަ ވިސްނުމާއި އިޚުތިޔާރުގައި ބުނެވޭ ބަހަކުން ނުވަތަ ދެވޭ ވޯޓަކުން އެ މެންބަރުންގެ ގޮނޑި ގެއްލިދާނެ ކަމުގެ ބިރު އޮތުމުގެ ސަބަބުން މަޖިލީހަކީ ޕާޓިގެ ހަރުގެއަކަށް ބަދަލުވާނެ އެވެ. މެންބަރުންނަށް އެ މެންބަރުން ހޮވި ދާއިރާގެ ހައްގުގައި މިނިވަންކަމާއެކު ވަކާލާތުކުރުމުގެ އެއްވެސް ބާރެއް ނޯންނާނެ އެވެ. އެހެންކަމުން ރައްޔިތުންގެ މަޖިލީހަކީ އެއްވެސް ބާރެއް އާރެއް ނެތް ތަނެއް ކަމަށް ވެދާނެ އެވެ.

މިއަދުގެ ހާލަތަށް ބަލާއިރު ވެރިކަންކުރާ ޕާޓީއަކީ ޕީއެންސީ އެވެ. އެ ޕާޓިގެ މެންބަރުން މަޖިލީހުގެ ޖުމުލަ މެންބަރުންގެ ތިންބައިކުޅަ ދެބަޔަށް ވުރެ ގިނަ އެވެ. ޕާޓީގެ ރައީސަކީ ގައުމުގެ ރައީސެވެ. އެހެންކަމުން ސަރުކާރު ހިނގާ ގޮތާމެދު ފާރަވެރިވެ، ފާޑުކިޔައި ޚިޔާލުފާޅު ކުރުމުގެ ވާޖިބު ރައްޔިތުންގެ މަޖިލީހަށް އަދާކުރެވޭނެ އެއްވެސް ގޮތެއް ނޯންނާ އެވެ. ނަތީޖާއެއްގެ ގޮތުން ގާނޫނު އަސާސީއިން ބާރު ލިބިގެން ރާއްޖޭގެ ސަރުކާރު މިސްރާބު ޖަހާފައި ވަނީ ޚުދުމުޚުތާރު ވެރިކަމަކާ ދިމާއަށެވެ.