ބޮލީވުޑްގެ ކުރީގެ އެކްޓްރެސް ސަނާ ޚާންއާއި އޭނާގެ ފިރިމީހާ މުފްތީ އަނަސް ސައްޔިދުއަށް ދެވަނަ ދަރިއަކު ލިބެން އުޅޭކަން އިއުލާން ކޮށްފި އެވެ.

މިދިޔަ ހުކުރު ދުވަހު ސަނާ އޭނާގެ އިންސްޓަގްރާމްގައި ކުރި ޕޯސްޓެއްގައި ބުނެފައިވަނީ ތިން މެމްބަރުން ހިމެނޭ އެ އާއިލާ ވަރަށް އަވަހަށް ހަތަރު މެމްބަރުންނަށް ވާނެ ކަމަށެވެ.

"މާތް ﷲގެ އިރާދަފުޅާއެކު އަހަރުމެންގެ އާއިލާ ވަރަށް އަވަހަށް ހަތަރު މެމްބަރުންގެ އާއިލާއަކަށް ވާނެ. މިވަގުތު އެންމެންގެ ހެޔޮ ދުއާއަށް އެދެން" ސަނާ ބުނެފައިވެ އެވެ.

https://www.instagram.com/sanakhaan21/?utm_source=ig_embed&ig_rid=2fe3d88d-847f-4e43-89c5-c84160c19cec

ދެވަނަ ދަރިއަކަށް ބަލިވެ އިންކަން ސަނާ އިއުލާން ކޮށްފައި މިވަނީ އޭނާގެ ފުރަތަމަ ދަރިފުޅު ސައްޔިދު ތާރިގް ޖަމީލު އުފަންވިތާ ގާތްގަނޑަކަށް ދޮޅު އަހަރު ފަހުންނެވެ.

ސަނާ އާއްމުންގެ މަޝްހޫރުކަން ހޯދާފައިވަނީ ރިއަލިޓީ ޝޯ "ބިގްބޮސް"ގެ ހަވަނަ ސީޒަންގެ ބައިވެރިއެއްގެ ގޮތުގަ އެވެ. އޭގެ އިތުރުން ވެސް ބޮލީވުޑްއާއި ޓެލީވުޑްގެ އުފެއްދުންތަކުން އޭނާ ފެނިގެންދިޔަ އެވެ.

އެ ދާއިރާގެ އެންމެ އުހުގައި ފިޔަޖަހަމުން ދަނިކޮށް ސަނާ ވަނީ 2020 ވަނަ އަހަރު "އޭނާ ހެއްދެވި ފަރާތުގެ އަމުރުފުޅުތަކަށް ކިޔަމަންވުމަށް" ކަމަށް ބުނެ ބޮލީވުޑާއި ދުރަށް ގޮސްފަ އެވެ.

އޭގެ ފަހުން މުނިފޫހި ފިލުވުމުގެ ދާއިރާއިން ސަނާ ފެނިފައިނުވާއިރު އޭނާ އަންނަނީ އޭނާގެ ދިރިއުޅުމުގެ ކަންކަން ސޯޝަލް މީޑިއާ މެދުވެރިކޮށް އާއްމުންނާ ހިއްސާ ކުރަމުންނެވެ.