އިޒްރޭލުން ފަލަސްތީނުގައި ހިންގަމުންދާ ގަތުލްއާއްމާއި ދެކޮޅު ހެދުމުގެ ގޮތުން އިޒްރޭލު މީހުނަށް ރާއްޖެ ނާދެވޭގޮތަށް އިޒްރޭލު ޕާސްޕޯޓް މަނާކުރުމަށް މަޖިލީހަށް ހުށަހަޅާފައިވާ މައްސަލައަށް ފަސް މަސްވެ، އާންމުގެ ފާޑުކިޔުން ސަރުކާރަށް އަމާޒުވުމުން މައްސަލައިގެ ކޮމިޓީ މަރުހަލާ އަވަސްކުރަން މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ އިން އިން މިއަދު ފާސްކޮށްފި އެވެ.

އިދިކޮޅު އެމްޑީޕީގެ ފަރާތުން ގަލޮޅު ދެކުނު ދާއިރާގެ މެންބަރު މީކައިލް އަހުމަދު ނަސީމް ހުށަހެޅި މައްސަލަ ކުރިއަށް ނުގެންގޮސް އެތައް މަހަކު ބޭއްވުމަށްފަހު މިދިޔަ ހަފްތާގައި ކޮމިޓީން ވަނީ ޑިސެމްބަރުގެ ނިޔަލަށް ކަމާ ބެހޭ އިދާރާތަކަށް ސިޓީ ފޮނުވައި އެ ތަންތަނުން ލިބޭ ޖަވާބަކަށް ބެލުމަށްފަހު އެ ފަރާތްތައް ކޮމިޓީއަށް ހާޒިރުކުރުމަށެވެ. ނަމަވެސް ބިލުގެ މަސައްކަތް އަވަސް ކުރުމަށް ނިންމައި ކުރިން ނިންމި ނިންމުން ބަދަލުކުރުމަށް މިއަދު ވަނީ ކޮމިޓީން ފާސްކޮށްފަ އެވެ.

މިއަދު ބޭއްވި 241 ކޮމިޓީގެ އިއްތިފާގުން ފާސްވީ މާދަމާއިން ފެށިގެން ވެސް ކަމާބެހޭ ފަރާތްތައް ހާޒިރުކޮށް ސުވާލުކޮށް މައުލޫމާތު އެއްކުރުމަށެވެ. އެގޮތަށް ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ.

މި ބިލުގެ ކޮމިޓީ މަސައްކަތް ނިންމުމަށް ފާސްކުރީ ފެބްރުއަރީ 2025 އަށެވެ.

ބިލު ހުށަހެޅީ މިދިޔަ މެއި 29 ވަނަ ދުވަހު އެވެ. އެ ބިލް ބަލައިގަނެ ސަލާމަތީ ހިދުމަތްތަކާ ބެހޭ ކޮމިޓީއަށް ފޮނުވީ މިދިޔަ ޖޫން މަހުގެ 10 ވަނަ ދުވަހު އެވެ.

ކޮމިޓީން ބިލުގެ މަސައްކަތް ކުރިއަށް ނުގެންގޮސް ގިނަ ދުވަސްތަކެއް ވަމުންދާތީ އިދިކޮޅުން އެކި ފަހަރުމަތިން ހުށަހެޅި ކުއްލި މައްސަލަތައްވެސް ޕީއެންސީގެ ސްޕަ މެޖޯރިޓީ އޮންނަ މަޖިލީހުން ވަނީ ބޭރުކޮށްލާފަ އެވެ.