މި އަހަރުގެ މިހާތަނަށް ރަޝިއާއިން ރާއްޖެއަށް 200،000 ވުރެ ގިނަ ޓޫރިސްޓުން އަތުވެއްޖެ ކަމަށް ތަފާސްހިސާބުތަކުން ދައްކައިފި އެވެ.

ޓޫރިޒަމް މިނިސްޓްރީން ނެރުނު ރިޕޯޓުގައިވާ ގޮތުން ރަޝިއާއަކީ ރާއްޖެއަށް މިހާރު ދެ ވަނައަށް އެންމެ ގިނައިން ޓޫރިސްޓުން އަންނަ ގައުމެވެ. އަދި ރާއްޖެއަށް އައި ޖުމްލަ ޓޫރިސްޓުންގެ 11.2 ޕަސެންޓް ހިއްސާކުރަނީ ރަޝިއާ ޓޫރިސްޓުން ކަމަށް އެ ރިޕޯޓުގައި ބުނެފައިވެ އެވެ.

ތަފާސްހިސާބުތައް ދައްކާގޮތުން އަހަރުގެ މިހާތަނަށް ރަޝިއާއިން ރާއްޖެއަށް 201،491 ޓޫރިސްޓުން އައިސްފައިވެ އެވެ. މިދިޔަ އަހަރުގެ މި މުއްދަތުގައި އެ ގައުމުން ރާއްޖެއަށް އައިސްފައި ވަނީ 189،541 ޓޫރިސްޓުންނެވެ. މިއީ މިދިޔަ އަހަރަށް ވުރެ ހަ ޕަސެންޓް އިތުރު އަދަދެކެވެ. މިދިޔަ އަހަރުގެ ޑިސެމްބަރު މަހުގެ ނިޔަލަށް ރަޝިއާއިން އައިސްފައި ވަނީ 209،146 ޓޫރިސްޓުންނެވެ.

ރާއްޖެއަށް މިހާރު އެންމެ ގިނަ އަދަދަކަށް ޓޫރިސްޓުން އަންނަނީ ޗައިނާއިންނެވެ. އެގޮތުން އަހަރުގެ މިހާތަނަށް އެ ގައުމުން ރާއްޖެއަށް ވަނީ 248،141 ޓޫރިސްޓުން އައިސްފަ އެވެ.

މިއަހަރުގެ ހައި ސީޒަނާ ދިމާކޮށް މިދުވަސްވަރު ރާއްޖެއަށް އެއާލައިންތަކުން ކުރާ ދަތުރުތައް ވެސް ވަނީ އިތުރުވެފަ އެވެ.

ހިސާބުތައް ދައްކާގޮތުން އަހަރުގެ މިހާތަނަށް ޖުމްލަ 1،797،028 ޓޫރިސްޓުން ވަނީ އައިސްފަ އެވެ. މި އަދަދަކީ މިދިޔަ އަހަރުގެ މި މުއްދަތުގައި ރާއްޖެއަށް އައި 1،646،327 ޓޫރިސްޓުންނާ އަޅާ ބަލާއިރު 9.2 ޕަސެންޓް އިތުރު އަދަދެކެވެ.

ސަރުކާރުން މިއަހަރަށް އަމާޒު ހިފާފައި ވަނީ ރާއްޖެއަށް ދެ މިލިއަން ޓޫރިސްޓުން ގެނައުމަށެވެ. މި އަމާޒު ހާސިލްކުރުމަށް ދެން ބޭނުންވަނީ 353،673 ޓޫރިސްޓުންނެވެ. އަދި ރާއްޖެއަށް މިހާރު ކޮންމެ ދުވަހަކު 5،756 ޓޫރިސްޓުން އަންނަ އިރު، މިއަހަރަށް ހިފާފައިވާ އަމާޒު ޑިސެމްބަރުމަހުގެ ތެރޭގައި ހާސިލްކުރެވޭނެ ކަމަށް ޓޫރިޒަމް މިނިސްޓްރީން ލަފާކުރެ އެވެ.