މިނިވަން މުއައްސަަސާތަކެއް ކަމަށްވާ އިލެކްޝަންސް ކޮމިޝަން (އީސީ) އަދި އެންޓި ކޮރަޕްޝަން ކޮމިޝަން (އޭސީސީ)ގެ ރައީސުންނާއި ނައިބު ރައީސުންނަކީ ރައީސުލްޖުމްހޫރިއްޔާ އައްޔަންކުރައްވާ ފަރާތްތަކަކަށް ހެދުމަށް އެ ދެ ކޮމިޝަންގެ ގާނޫނަށް ސަރުކާރުން ހުށަހެޅި އިސްލާހީ ބިލު މަޖިލީހުން މިއަދު ފާސްކޮށްފި އެވެ.

މިއަދުގެ ޖަލްސާގައި ނެގި ވޯޓުގައި އޭސީސީގެ ބިލު ފާސްކުރަން ވޯޓު ދެއްވީ 69 މެންބަރުންނެވެ. ދެކޮޅަށް 10 މެންބަރަކު ވޯޓުދެއްވި އެވެ. އީސީގެ ބިލު ފާސްކުރަން ފެންނަކަމަށް ވޯޓު ދެއްވީ 69 މެންބަރުންނެވެ. އެ ވޯޓުގައި ވެސް ދެކޮޅަށް 10 މެންބަރަކު ވޯޓު ދެއްވި އެވެ.

މި ބިލްތަކުގައިވާ ގޮތުން އޭސީސީ އަދި އީސީގެ ރައީސް އަދި ނައިބު ރައީސް ކަމަށް އައްޔަނުކުރަން ބޭނުންވާ މީހެއްގެ ނަން (އެ ކޮމިޝަންގަ ތިބި މެންބަރުންގެ ތެރެއިން މެންބަރެއްގެ ނަމެއް) ރައީސުލްޖުމްހޫރިއްޔާ މަޖިލީކަށް ފޮނުވުމުން މަޖިލީހުގެ ވޯޓެއް ނަގަައި ނަން ފާސްކުރަން ޖެހެ އެވެ.

މިހާރުގެ ގާނޫނު އޮންނަ ގޮތުން އެސީސީ އަދި އީސީގެ ރައީސް އަދި ނައިބު ރައީސް އައްޔަން ކުރަނީ އެ މެންބަރުންގެ ތެރޭގައި ނަގާ އަމިއްލަ ވޯޓަކުންނެވެ.

މި ބިިލުތަކާ ދެކޮޅަށް އިދިކޮޅު އެމްޑީޕީއިން ވަނީ އަޑުއުފުލާފަ އެވެ. އަދި މި ބިލުތަކަކީ ޑިމޮކްރަޓިކް އުސޫލްތަކާ ޚިލާފަށް މިނިވަން މުވައްސަސާ ތަކުގެ ތެރެއަށް ސަރުކާރުން އަތްބޭނުން ކަމަށް ވަނީ އެމްޑީޕީއިން ވަނީ ސިފަކޮށްފަ އެވެ.

ނަމަވެސް ސަރުކާރަށް ނިސްބަތްވާ މެންބަރުން ބުނަނީ މިއީ ހުއްޓިފައިވާ މުއައްސަސާތަކެއް އަލުން ހިނގުމަށް މަގުފަހުވެގެންދާނެ ބިލުތަކެއް ކަމަށެވެ.