ސޯޝަލް މީޑިއާއަކީ ދެމިއަލީ ކަނޑިއެއް ފަދަ އެއްޗަކަށް ވީއިރު އެއިން ލިބޭ ގެއްލުންތަކަކީ ދަރިން ސޯޝަލް މީޑިއާއަށް ވެއްދުމުގައި ބެލެނިވެރިން ފަސްޖެހޭ މައިގަނޑު އެއް ސަބަބެވެ.

އެގޮތުން އޮޅުވާލައިގެން މީހުންނާ ވާހަކަ ދެއްކުމާއި ސޯޝަލް މީޑިއާ ބޭނުންކޮށްގެން ބްލެކް މެއިލްކުރުން ފަދަ ކަންކަން މިހާރު ދަނީ އާއްމުވަމުންނެވެ.

މި ކަންކަމަށް ބަލާއިރު ދަރިން ސޯޝަލް މީޑިއާއަށް ތައާރަފްކުރާއިރު، އެ ކުދިންނަށް ކިޔައިދޭންޖެހޭ ބައެއް ކަންތައްތައް ހުރެ އެވެ. އަދި ބަލަންޖެހޭ ކަންތައްތައް ވެސް ހުރެ އެވެ.

ސޯޝަލް މީޑިއާއަށް ދަރިން ތައާރަފުކުރާ އުމުރަކީ އެކަމަށް ހުއްދަކުރެވިފައިވާ އުމުރެއްކަން ކަށަވަރު ކުރަން ޖެހޭނެ އެވެ. ގިނަ ސޯޝަލް މީޑިއާ ޕްލެޓްފޯމްތަކަށް ވަދެވެނީ އުމުރުން 13 އަހަރުވުމުން ކަމަށްވުމާއެކު ދޮގު މައުލޫމާތު ދީގެން މިއަށްވުރެ ހަގު ކުދިން ސޯޝަލް މީޑިއާއަށް ތައާރަފުކުރުމާ ދުރުވާން ޖެހެ އެވެ.

ހަމަ އެއާއެކު އުމުރާ އަޅާބަލާއިރު ދަރިންގެ ވިސްނުމުގެ ގާބިލިއްޔަތު މިނެކިރަން ވާނެ އެވެ. ހެޔޮނުބައި ވަކިވާވަރުގެ ޔަގީންކަން އެކުދިންގެ ވިސްނުމުގައި ހުންނަން ވާނެ އެވެ. މިއާއެކު ދަރިންގެ ސޯޝަލް މިޑިއާ އެކައުންޓްތަކަށް ބެލެނިވެރިންގެ އެކްސެސް އޮވެ އެ ކުދިން ކުރާ ކަންތައްތައް ބެލޭނެގޮތް އޮންނަންވާނެ އެވެ.

މަތީގައި ދެންނެވުނު ކަންކަމަށް ބަލާއިރު ސޯޝަލް މީޑިއާ ޕްލެޓްފޯމްތަކަށް ދަރިން ތައާރަފު ކުރުމަށް އެންމެ ރަނގަޅު އުމުރަކީ އެކަމަށް ދަރިންގެ ވިސްނުން ތަސައްވަރު ފުދުމެވެ. ގިނަ ސައިންސްވެރިން ބުރަވާ ގޮތުގައި އެއީ އުމުރުން 15 އަހަރެވެ.