އިޒްރޭލު ޕާސްޕޯޓް މަނާކުރާނެކަމަށް މުޅި ދުނިޔެއަށް އިއުލާންކޮށް ދޮގުހަދާ ދިވެހިން ލަދުގަންނަވާލައިފި ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެ އެވެ.

އުމަރު ނަސީރު ރޭ ކުރެއްވި އެކްސް ޕޯސްޓެއްގައި ވިދާޅުވީ ފަލަސްތީނުގައި މުސްލިމުން މަރާ ބަޑަށް ޖައްސާ ގެދޮރުންނެރެ ސުންނާފަތި ކުރުމަށްފަހު، އިޒްރޭލުގެ ސިފައިންގެ މީހާ އަރާމު ކޮށްލަން ރާއްޖެ އަންނައިރު، އިޒްރޭލު ޕާސްޕޯޓް މަނާކުރާނެ ކަމަށް މުޅިދުނިޔެއަށް އިއުލާން ކުރުމަށްފަހު އެކަމުގައިވެސް ދޮގުހަދާ ހުރިހާ ދިވެހިން ލަދުގަންނަވާލައފި ކަމަށެވެ.

ރައީސް މުހައްމަދު މުއިއްޒު ވަނީ ނިމިދިޔަ ޖޫން މަހު އިޒްރޭލު ޕާސްޕޯޓް މަނާކުރަން ވަޒީރުންގެ މަޖިލީހުން ނިންމެވިކަން އިއުލާން ކުރައްވާފަ އެވެ. ނަމަވެސް ވަޒީރުންގެ މަޖިލީހުގެ ގަރާރަކުންވެސް ނިންމެން އޮތް ކަމެއް، ރައީސް ވިދާޅުވީ މަޖިލީހަށް ފޮނުއްވައިގެން ގާނޫނަށް ގެންނަންޖެހޭ އިސްލާހުތައް ގެނެއުމުގެ މަސައްކަތް ކުރާނެކަމަށެވެ.

ރައީސް އިއުލާން ކުރެއްވުމުގެ ކުރިން އިދިކޮޅު އެމްޑީޕީން ވަނީ އިޒްރޭލު ޕާސްޕޯޓް މަނާކުރުމަށް ގާނޫނަށް އިސްލާހު ގެނައުމަށް ރައްޔިތުންގެ މަޖިލީހަށް ބިލެއް ހުށަހަޅާފަ އެވެ. ސަރުކާރުން އިޒްރޭލު މީހުނަށް ރާއްޖެ ނާދެވޭގޮތަށް މަނާކުރާނެކަމަށް ބުނެ އިއުލާންކުރިނަމަވެސް މަޖިލީހަށް ހުށަަަހަޅާފައިވާ މައްސަލަ ދަނީ ގަސްދުގައި ލަސްކުރަމުންނެވެ.

މިހާރު ޕީއެންސީގެ ރާގު ބަދަލުވެ، އިޒްރޭލު ޕާސްޕޯޓް މަނާކުރުމާމެދު ދުނިޔޭގެ އެހެން ގައުމުތަކުގެ ހިޔާލު ހޯދަން ޖެހޭކަމަށް ޕީއެންސީގެ ޕާލިމެންޓަރީ ގްރޫޕުގެ ލީޑަރު އިބްރާހިމް ފަލާހުވަނީ ވިދާޅުވެފަ އެވެ. މީގެ އިތުރުން ޕީއެންސީގެ ބައެއް މެންބަރުން ދަނީ ޕާސްޕޯޓް މަނާކުރުމާއިމެދު އެކި ބަހަނާ ދައްކަމުންނެވެ. އެހެންކަމުން ސަރުކާރުން އެކަން ކުރުމުގައި އިހުލާސްތެރިކަމެއް ނެތްކަން ވަނީ ހާމަވެފަ އެވެ.