ކުޑަކުދިންނަށް ތަދު ކަނޑުވަން ދޭ ދެ ބޭހަކުން ނުރައްކާތެރި ދެ ކެމިކަލެއް ފެނިފައިވާތީ މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން މި ދެ ބޭސް ވިއްކުން މަނާކޮށްފި އެވެ.

އެކަމާ ގުޅިގެން އެމްއެފްޑީއޭއިން ނެރުނު ބަޔާނެއްގައި މި ދެ ބޭހުން ނުރައްކާތެރި ކެމިކަލެއް ކަމަށްވާ ޑައިއީތަލިން ގްލައިކޯލް އަދި އީތައިލިން ގްލައިކޯލް ފެނިފައިވާ ކަމަށް ބުނެފައިވެ އެވެ. އަދި މި ދެ ބޭހަކީ ޕާކިސްތާނުން އުފައްދައި މެފްނެކް ސުސްޕެންޝަންގެ 50 މިލިގްރާމް (މެފެނެމިކް އެސިޑް) އަދި މެލޭޝިއާގައި އުފައްދާ އެކްސެލް މެފެނެމިކް އެސިޑް ސަސްޕެންޝަން 125 މިލިގްރާމް (މެފެނެމިކް އެސިޑް)އިން ކަމަށް އެމްއެފްޑީއޭ އިން ބުނެ އެވެ.

މި ދެބޭހުގެ އިތުރު ތަހުލީލުތަކަށް ރާއްޖޭން ބޭރަށް ފޮނުވުމުގެ މަސައްކަތް ކުރަމުން ދާކަމަށް އެމްްއެފްޑީއޭ އިން ވަނީ ބުނެފަ އެވެ.

އެހެންކަމުން އެ އޮތޯރިޓީން ވަކި އެއްޗެއް އަންގަން ދެން އެ ދެ ބޭހުގެ އެއްވެސް ބެޗެއް ރާއްޖެ އެތެރެކުރުމާއި ވިއްކުމާއި ބޭނުންކުރުން ވަގުތީ ގޮތުން މަނާކޮށްފައިވާ ކަމަށެވެ. އަދި މިވަގުތު ބޭސްފިހާރަތަކުގައި ހުރި މި ބޭހުގެ ސްޓޮކްތައް ވެސް ވަކިކޮށްފައި ބެހެއްޓުމަށް އެމްއެފްޑީއޭއިން ވަނީ އިލްތިމާސްކޮށްފަ އެވެ.