ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ)ގެ އެންމެ އިސްވެރިޔާ، ޗީފް ޖުޑީޝަލް އެޑްމިނިސްޓްރޭޓާ (ސީޖޭއޭ)ގެ މަގާމަށް ކުރީގެ ގާޒީ ޒުބައިރު މުހައްމަދު ހޮވިފައި ވަނިކޮށް، ރައީސް ޑރ. މުހައްމަދު މުއިއްޒުގެ އެންގުމަށް އެހެން ބޭފުޅަކަށް އެ މަގާމު ދޭން ނިންމައިފި އެވެ.

ޖުޑީޝަލް ސާވިސް ކޮމިޝަން (ޖޭއެސްސީ)ގެ އޮފިޝަލަކު ނަން ހާމަނުކުރުމަށް އެދި "ހުރިހާ" އަށް މިއަދު ވިދާޅުވީ ރައީސް މުއިއްޒުގެ އެންގެވުމަށް އެހެން ބޭފުޅަކު އެ މަގާމަށް ހަމަޖެއްސުމަށްޓަކައި އެ މަގާމަށް ބޭފުޅަކު ހޯދަން ކުރި އިއުލާން ބާތިލްކުރަން ކޮމިޝަނުން ފާސްކޮށްފައިވާ ކަމަށެވެ.

އެ ކޮމިޝަނުން ކުރި އިއުލާނާ ގުޅިގެން ސީޖޭއޭގެ މަގާމަށް ކުރިމަތިލެއްވި ބޭފުޅުންގެ ތެރެއިން އިންޓަވިއުއިންނާއި އެހެނިހެން ގޮތްގޮތުން އެންމެ މަތީ މާކްސް ހޯއްދެވީ ފ. ދަރަނބޫދޫ ކޯޓްގެ މެޖިސްޓްރޭޓް ކަމާއި ކްރިމިނަލް ކޯޓާއި ޑްރަގް ކޯޓާއި ސިވިލް ކޯޓުގެ ގާޒީކަން ކުރައްވާފައިވާ ޒުބައިރު ކަމަށް އޮފިޝަލް ވިދާޅުވި އެވެ.

"މުޅި ޕްރޮސެސް ނިންމި އިންޓަވިއު ނިމި މާކްސް ދީ ނިންމާފައި އޮތީ. އަދި އެ އެ މަގާމަށް ކުރިމަތިލި މީހުންގެ ތެރެއިން އެކެއް، ދޭއް އަދި ތިނެއް ވެސް ހޮވި. އޭގެ ތެރެއިން ޒުބައިރު މުހައްމަދަށް އެންމެ މަތިން މާކްސް ލިބިގެން ކޮމިޝަނުގެ ބައެއް މެމްބަރުން މަރުހަބާ ކިޔާފައި ވެސް،" އޮފިޝަލް ވިދާޅުވި އެވެ.

ރައީސް މުއިއްޒު އަންގައިގެން ޖުޑިޝަރީއަށް ނުފޫޒު ފޯރުވަމުން ގެންދާ ބަންޑާރަ ނައިބު އުޝާމް ކެބިނެޓްގައި. ފޮޓޯ: ރައީސް އޮފީސް

އޭނާ ވިދާޅުވީ އިންޓަވިއު ޕެނަލްގެ ރިޕޯޓު ފާސްކޮށް، ސީޖޭއޭ މަގާމަށް ބޭފުޅަކު ނެގުމަށް ޖޭއެސްސީގެ ޖަލްސާއަށް އެޖެންޑާ ކުރަމުން އަންނަތާ އެތައް ދުވަހެއް ވެއްޖެ ކަމަށެވެ. ނަމަވެސް ފާއިތުވެދިޔަ ތިން ހަފްތާގައި ޝެޑިއުލްކުރެވޭ ކޮންމެ ދުވަހަކު ޖަލްސާގެ އެޖެންޑާ ތައްޔާރުކުރާއިރު އެ މައްސަލަ އޮންނަ ކަމަށް އެ އޮފިޝަލް ވިދާޅުވި އެވެ. ނަމަވެސް ފައިނަލްވާ އެޖެންޑާއިން އެ މައްސަލަ އުނިކުރެވެ އެވެ.

"ހަފުތާއަކު އެއް ޖަލްސާ މި އޮންނަނީ. ކޮންމެ ޖަލްސާއެއްގެ ފައިނަލް އެޖެންޑާއިން އުނިކުރަނީ ސީދާ ކޮމިޝަނުގެ ރައީސް ހުސައިން ރިޒާ އާދަމްގެ އެންގެވުމަށް،" އޮފިޝަލް ވިދާޅުވި އެވެ.

ޖޭއެސްސީގެ ރައީސަކީ މާފުށި ދާއިރާގެ މެމްބަރު ހުސައިން ރިޒާ އާދަމެވެ.

ސީޖޭއޭގެ މަގާމަށް ބޭފުޅަކު ހޯދުމަށް ކުރި އިއުލާން ބާތިލްކުރި ޖޭއެސްސީގެ ޖަލްސާގައި، ހޯމަ ދުވަހު ރައްޔިތުންގެ މަޖިލީހުގައި ސިވިލް ސާވިސް ކޮމިޝަނުގެ ރައީސްކަމުން ވަކިކުރުމަށް ނެގި ވޯޓުން ސަލާމަތްވި މުހައްމަދު ނާސިހު ބައިވެރިވެފައިވެ އެވެ. އަދި ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާއި ރައީސުލްޖުމްހޫރިއްޔާގެ މެންބަރުގެ މުހައްމަދު ސަމީރާއި ބަންޑާރަ ނައިބު އަހުމަދު އުޝާމް ވެސް ބައިވެރިވެފައިވެ އެވެ.

އޮފިޝަލް ވިދާޅުވީ އެ އިއުލާން ބާތިލްކުރީ ރައީސް މުއިއްޒުގެ އޯޑަރަށް ބަންޑާރަ ނައިބު އުޝާމް އަންގައިގެން ކަމަށެވެ. އަދި ސީޖޭއޭގެ މަގާމަށް ނަގަންވީ ކޮން ބޭފުޅަކުކަން ރައީސް މުއިއްޒު ބަންޑާރަ ނައިބު އުޝާމަށް އަންގަވާފައިވާ ކަމަށް ވެސް އޭނާ ވިދާޅުވި އެވެ.

"ސީދާ އުޝާމް އެބަހުރި ޒުބައިރުއާ ބެހޭ ގޮތުން އެކި ވާހަކަތައް ކޮމިޝަންގެ ބައްދަލުވުމުގައި ދައްކާފައި. އޭގެ ފަހުން އިއުލާން ބާތިލުކުރަން ނިންމީ ވެސް،" އެ އޮފިޝަލް ވިދާޅުވި އެވެ.