އިދިކޮޅު އެމްޑީޕީގެ ހޯރަފުށީ ދާއިރާގެ ނައިބު ރައީސް ހުސައިން ޝާފިއު އެކްސްގައި "ކައްޒާބު" ގޮވުމާ ގުޅިގެން ފުލުހަށް ހާޒިރުވުމަށް ޗިޓު ފޮނުވައިފި އެވެ.

ފުލުހަށް ހާޒިރު ކުރަނީ ސިނގިރޭޓް ފޮއްޓެއް 270 ރުފިޔާއަށް ގަންނަން ޖެހުމުން ހިތްހަމަ ނުޖެހިގެން އޭނާ ނޮވެމްބަރު 8 ވަނަ ދުވަހު މެންދުރުގެ ވަގުތެއްގައި ކުރި އެކްސް ޕޯސްޓެއްގެ މައްސަލައިގަ އެވެ.

ސޯޝަލް މީޑިއާގައި ސަރުކާރަށް ވަރަށް ބޮޑަށް ފާޑުކިޔާ ޝާފިއު ފުލުހަށް ހާޒިރުވާން އަންގާފައިވަނީ މާދަމާ 1:30 އަށެވެ.

މިކަމާ ގުޅިގެން އެމްޑީޕީގެ ލީޑާޝިޕާއި އާންމު މެންބަރުން ދަނީ ނުރުހުން ފާޅުކުރަމުންނެވެ.

އެ ޕާާޓީގެ ޗެއާޕާސަން ފައްޔާޒު އިސްމާއިލް ވިދާޅުވީ ޓްވީޓު ކުރާތީ ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ "އަބުރުފުޅު"ގެ ހިމާޔަތުގައި ކައުންސިލަރުންނާ ދެކޮޅަށް ފިޔަވަޅު އަޅަން ފަށައިފައިވާ ކަަމަށެވެ. އަދި ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް މިއަދު ވެއްޖެ ކަމަށާއި ރައްޔިތުންގެ އަޑު ކަނޑުވާލައި، ހިޔާލު ފާޅުކުރުމަށް ހުދުމުހުތާރު ވެރިން އަބަދުވެސް ހުރަސް އަޅާނެ ކަަމަށް އޭނާ ވިދާޅުވި އެވެ.

"ހިޔާލާއި ފިކުރުގައި ތަޅެއް ނޭޅުވޭނެ. މިހެން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ،" ފުލުސް އޮފީހަށް ހާޒިރުވާން ޝާފިއު (ތުއްތު) އަށް އަންގައިފައި ވާކަން ހާމަކުރައްވާ ފައްޔާޒު ކުރެއްވި ޕޯސްޓްގައި ވިދާޅުވި އެވެ.

ސަރުކާރުން ގެންދަނީ ހިޔާލު ފާޅުކުރުމުގެ މިނިވަން ކަމާއި ނޫސްވެރިކަމުގެ މިނިވަން ކަމަށް ހުރަސް އެޅުމަށް އެކި ގޮތްގޮތުން މަސައްކަތްކުރަމުންކަން ފާހަގަކޮށްލެވެ އެވެ.