ދައުލަތުގެ ބަންޑާރަނައިބުގެ އޮފީސް، ސިވިލް ސާވިސްއިން ވަކިކޮށް، ވަކި ޚިދުމަތަކަށް ހެދުމަށްޓަކައި ރައްޔިތުންގެ މަޖިލީހަށް މިއަދު ބިލެއް ހުށަހަޅައިފިއެވެ.

މިއަދުގެ ޖަލްސާގައި މި ބިލު ހުށަހަޅުއްވާފައިވަނީ މާފަންނު ދެކުނު ދާއިރާގެ މެންބަރު އަބްދުﷲ ރިފާއު އެވެ.

ބިލުގައިވާ މައިގަނޑު ކަންކަން

  • ބަންޑާރަނައިބުގެ އޮފީސް ދިވެހި ސިވިލް ސަރވިސްއިން ވަކިކޮށް ވަކި އޮފީހެއްގެ ގޮތުގައި ހަމަޖެއްސުން
  • ގާނޫނުއަސާސީގެ 133 ވަނަ މާއްދާގެ (ހ) ގެ ދަށުން ބަންޑާރަނައިބުގެ މަގާމަށް އައްޔަނުކުރެވޭ ފަރާތެއްގައި ހުންނަންޖެހޭ ޝަރުތުތަކާއި، ބަންޑާރަނައިބުގެ ޒިންމާތަކާއި މަސްއޫލިއްޔަތުތަކާއި، އެ ޒިންމާތަކާއި މަސްއޫލިއްޔަތުތައް އަދާކުރުމުގައި ބަންޑާރަނައިބު ތަބާވާންޖެހޭ ހަމަތައް ކަނޑައެޅުން
  • ބަންޑާރަނައިބުގެ އޮފީހުގެ މަސައްކަތްތައް ރޭވިފައިވާ ގޮތާއި، އެ އޮފީސް ހިންގުމާގުޅޭ އުސޫލުތަކާއި، އެ އޮފީހުގެ މުވައްޒަފުންނާ ގުޅޭ އެންމެހާ އުސޫލުތައް ކަނޑައެޅުމަށް ބޭނުންވާ ގާނޫނީ އޮނިގަނޑު އެކުލަވާލުން
  • ބަނޑާރަނައިބު ކޮށްގެން ނުވާނެ ކަންކަން ބަޔާންކުރުން
  • އޮފީހުގެ ލީގަލް ޑިވިޝަން އަދި އެޑްމިނިސްޓްރޭޓިވް ޑިވިޝަން ވަކިކުރުން

މި ވަގުތު ސިވިލް ސަރވިސްގެ ދަށުން އޭޖީ އޮފީސް ހިންގަމުންދާތީ މުސާރަކުޑަ ވުމުގެ ސަބަބުން އެ އޮފީހަށް ފަންނީ ވަކީލުން ހޯދުމަށާއި މުސާރާއިގެ ކުރިއެރުން ދިނުމަށް ދަތިވާކަން އެ އޮފީހުން ފާހަގަކުރެ އެވެ.