މާލޭގެ އެއްގަމު ތޮށި މަރާމާތުކުރުމުގެ، ޑިޒައިން މަސައްކަތް ކުރުމަށް ޖަޕާނުގެ ކޮންސަލްޓަންޓަކާއެކު އެއްބަސްވުމެއްގައި ސޮއިކޮށްފި އެވެ.

ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީގެ ފަރާތުން ސޮއިކޮށްފައިވަނީ ސްޓޭޓް މިނިސްޓަރު، އިބްރާހީމް ޠައާމް މުހައްމަދު އެވެ. ޖަޕާނުގެ ކޮންސަލްޓަންޓް ޓީމްގެ ފަރާތުން ސޮއިކުރައްވާފައިވަނީ ޗީފް ކޮންސަލްޓަންޓް ހިރޯމީ ނަމިކީ އެވެ.

ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓްރީން ބުނީ މިއެއްބަސްވުމަކީ މާލެސިޓީގެ އެއްގަމު ތޮށި މަރާމަތުކުރުމުގެ މަސައްކަތުގެ ޑީޓެއިލް ޑިޒައިންކުރުމުގެ ގޮތުން ވެފައިވާ އެއްބަސްވުމެއް ކަމަށެވެ.

އެއްބަސްވުމަކީ މާލޭގެ އެއްގަމު ތޮށި މަރާމާތު ކުރުމުގެ މަސައްކަތުގެ ޑީޓެއިލް ޑިޒައިން ކުރުމުގެ ގޮތުން ވެފައިވާ އެއްބަސްވުމެކެވެ. އެ އެއްބަސްވުމުގެ ދަށުން އަންނަ އަހަރުގެ ފުރަތަމަ ކުއާޓަރާ ހަމައަށް ޑިޒައިނިން ފޭސް ނިންމުމަށް ރާވާފައިވާ ކަމަށް މިނިސްޓްރީން ބުންޏެވެ.

"ޕްރޮޖެކްޓް ފޮ ޑިޒާސްޓާ ރެޒިލިއަންސް އެންހޭންސްމަންޓް އިން މާލެ އައިލެންޑް" ގެ ދަށުން މި މަޝްރޫއު ކުރިއަށް ގެންދިއުމަށް ދިވެހި ސަރުކާރުން ޖަޕާނުގެ ސަރުކާރާ އެކު އެކްސްޗޭންޖް އޮފް ނޯޓްސްގައި ސޮއިކޮށްފައިވަނީ މިދިޔަ ސެޕްޓެމްބަރު މަހުގެ 19 ވަނަ ދުވަހު އެވެ. އަދި ގްރާންޓް އެއިޑްގެ އެއްބަސްވުމުގައި މިދިޔަ އޮކްޓޫބަރު މަހުގެ 28 ވަނަ ދުވަހު ސޮއިކޮށްފައިވެ އެވެ.

ޖަޕާނު ސަރުކާރުގެ އިކޮނޮމިކް އެންޑް ސޯޝަލް ޑިވެލޮޕްމަންޓް ޕްރޮގްރާމުގެ ދަށުން ކުރިއަށް ގެންދިއުމަށް ނިންމާފައިވާ މި މަޝްރޫއަށް ހިލޭ އެހީގެ ގޮތުގައި 20 މިލިއަން ޖަޕަނީސް ޔެން (140،000 ޑޮލަރު) ދޭން ނިންމާފައިވެ އެވެ.