ކެފޭ، ރެސްޓޯރެންޓުފަދަ ތަންތަނުގައި ދުންފަތުގެ އިސްތިއުމާލުކުރުމުގެ ހުއްދަ ނޯންނަ ސަރަހައްދުތަކުގައި ދުންފަތުގެ އިސްތިއުމާލުކުރުން ނުހުއްޓުވާނަމަ އެތަނެއްގެ ވިޔަފާރިކުރުމުގެ ހުއްދަ ބާތިލުކުރެވޭނެ ކަމަށް ހެލްތް މިނިސްޓްރީން ބުނެފި އެވެ.

ދުންފަތް ކޮންޓްރޯލްކުރުމަށް ކުރަމުން އަންނަ މަސައްކަތްތަކާއި ގުޅޭގޮތުން ނޫސްވެރިންނަށް މައުލޫމާތު ދިނުމަށް ބޭއްވި ބައްދަލުވުމެއްގައި ހެލްތް މިނިސްޓްރީން ބުނީ ކެފޭ، ރެސްޓޯރެންޓުފަދަ ތަންތަނުގައި ދުންފަތުގެ އިސްތިއުމާލުކުރުމުގެ ހުއްދަ ނޯންނަ ސަރަހައްދުތަކުގައި ދުންފަތުގެ އިސްތިއުމާލުކުރުން ނުހުއްޓުވާނަމަ އެތަނެއްގެ ވިޔަފާރިކުރުމުގެ ހުއްދަ ބާތިލުކުރެވޭނެ ކަމަށެވެ.

ރާއްޖޭގައި 2010ވަނަ އަހަރުގެ އޮގަސްޓް މަހުން ފެށިގެން އަމަލުކުރަމުން އަންނަ ދުންފަތް ކޮންޓްރޯލް ކުރުމާ ބެހޭ ޤާނޫނުގެ ދަށުން ދުންފަތުގެ އިސްތިއުމާލުނުކުރެވޭނެ ތަންތަން ކަނޑައަޅާފައި ވާއިރު، އެފަދަ ތަންތަނުގައި ދުންފަތުގެ އިސްތިއުމާލު ކުރާނަމަ އެ ކަން ކުރާ މީހަކު 500 ރުފިޔާއިން ޖޫރިމަނާ ކުރެވޭނެކަމަށް ޤާނޫނުގައި ބުނެ އެވެ.

އޭރު އަމަލުކުރަން ފެށި މި ޤާނޫނުގެ ދަށުން ކެފޭ، ރެސްޓޯރަންޓް ފަދަ ތަންތަނާއި އަދި މި ނޫންވެސް އެހެނިހެން ދުންފަތުގެ އިސްތިއުމާލު ނުކުރެވޭނެ ކަމަށް ކަނޑައަޅާފައި ސަރަހައްދުތަކުގައި ވަނީ އިންޒާރުގެ ނޯޓިސްތަކެއް ވެސް ހަރުކޮށްފަ އެވެ.

އެ ނޯޓިސްތަކުގައި 500 ރުފިޔާއިން ޖޫރިމަނާ ކުރެވޭނޭ ކަމަށް އިންޒާރުގައި ވީ ނަމަވެސް މިއަދާއި ހަމައަށް ވެސް އެކަން ކުރެވިފައެއް ނުވެ އެވެ. ސަބަބަކީ ޤާނޫނުގެ މި މާއްދާތައް ތަންފީޒުނުކުރެވުމެވެ. އެކަމުގެ ކަންބޮޑުވުން ގިނަ ބަޔަކު ވަނީ ފާޅުކޮށްފައި އެވެ.

މިކަމާ ގުޅޭގޮތުން ހެލްތް މިނިސްޓަރު ޢަބްދުﷲ ނާޒިމް ވިދާޅުވީ ގާނޫނުތައް ތަންފީޒު ކުރުމުގައި ގޮންޖެހުންތަކެއް ހުރި ކަމަށާއި މިއީ ހުރިހާ މުއައްސަސާއެއް ގުޅިގެން ހައްލުކުރަންޖެހޭ ކަމެއް ކަމަށެވެ އަދި މިހާރު ކުރެވެމުންދާ މަސައްކަތްތަކުން އެކަންކަމަށް ހައްލު ލިބޭނެކަމަށްވެސް ނާޒިމް ވިދާޅުވި އެވެ.

މިކަމާއި ގުޅިގެން ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ޑެޕިއުޓީ ޑިރެކްޓަރު ހަސަން މުހައްމަދު ވިދާޅުވީ، ތަންފީޒީ ކަންކަމަކީ އެންމެ ރަނގަޅަށް ނުވާ ކަންކަން ކަމަށް ގަބޫލު ކުރައްވާ ކަމަށާއި އެކަމުގައި އެންމެންގެ އެއްބާރުލުން ބޭނުންވާ ކަމަށެވެ.

އަދި ކެފޭ، ރެސްޓޯރެންޓުތަކުގައި ހުއްދަ ނެތް ތަންތަނުގައި ދުންފަތުގެ އިސްތިއުމާލުކުރާނަމަ އެކަމުގައި ތަނުގެ ވެރިފަރާތުގެ ޒިންމާއެއްވާ ކަމަށާއި އެ ބަދަލު ޤާނޫނަށް މިހާރު ގެނެސްފައިވާ ކަމަށެވެ.

އެ ޒިންމާ އަދާނުކުރާ ވިޔަފާރިތަކަށް ފިޔަވަޅު އެޅުމުގެ ގޮތުން ހުއްދަ ބާތިލުކުރެވޭނެ ކަމަށްވެސް ހަސަން ވިދާޅުވި އެވެ.

" ކެފޭ، ރެސްޓޯރެންޓުތަކުގައި ހުއްދަ ނެތް ތަންތަނުގައި ދުންފަތުގެ އިސްތިއުމާލުކުރާނަމަ އެކަމުގައި ތަނުގެ ވެރިފަރާތުގެ ޒިންމާއެއްވާނެ. އެ ބަދަލު ޤާނޫނަށް މިހާރު ވާނީ ގެނެސްފަ. އެހެންކަމުން ހެލްތުން އެ ތަނަށް ދޫކޮށްފައި ހުންނަ ހުއްދަ ބާތިލް ކުރުމުގެ ފުރުސަތު މިހާރު ޤާނޫނުން ލިބިދޭ." އެޗްޕީއޭގެ ޑެޕިއުޓީ ޑިރެކްޓަރު ހަސަން ވިދާޅުވި އެވެ.

ދުންފަތް ކޮންޓްރޯލްކުރުމާބެހޭ ޤާނޫނަށް ގެނެސްފައިވާ އިސްލާހުތަކުގެ ދަށުން މިހާރު ރާއްޖެއަށް ވޭޕުގެ ބާވަތްތައް އެތެރެކުރުން ވަނީ މި ސަރުކާރުން މަނާކޮށްފަ އެވެ. އަދި މި މަހުގެ 15ވަނަ ދުވަހުން ފެށިގެން އެފަދަ ތަކެތި ވިއްކުމާއި ބޭނުންކުރުންވެސް މަނާވާނެ އެވެ.