ކުޅުދުއްފުށި ސިޓީގައި އިދިކޮޅު އެމްޑީޕީން ބޭއްވި ޖަލްސާއެއްގައި ރައީސުލްޖުމްހޫރިއްޔާ މުހައްމަދު މުއިއްޒަށް "ރީތި ކެއްސެއް" ދޭނެކަމަށް ބުނެ އިންޒާރު ދިން މައްސަލައެއް ފުލުހުން ބަލަން ފަށައިފި އެވެ.

ފުލުހުން ބުނީ މި މައްސަލަ ފުލުހުންގެ ސަމާލުކަމަށް އައުމާ ގުޅިގެން، އެކަމާ ގުޅޭ ގޮތުން ބަލަންޖެހޭ ކަންކަން މިހާރު ދަނީ ބަލަމުންކަމަށެވެ.

ހުކުރު ދުވަހުގެ ރޭ ކުޅުދުއްފުށި ސިޓީގައި އެމްޑީޕީން ބޭއްވި ޖަލްސާގައި ރާއީސް މުއިއްޒަށް މި އިންޒާރު ދިނީ އެ ޕާޓީގެ އެކްޓިވިސްޓެއް ކަމަށްވާ އަބްދުއްރަހްމާން އިސްމާއިލެވެ. އޭނާ ވަނީ ރައީސް މުއިއްޒު ޤާނޫނުއަސާސީއާ ކުޅޭ ކަމަށްވާނަމަ، ”ރީތި ކެއްސެއް“ ލިބިގެންދާނެ ކަމަށް ބުނެ އިންޒާރު ދީފަ އެވެ.

އެރޭ އަބްދުއްރަހްމާން ދެއްކި ވާހަކައިގައި ވަނީ މި ސަރުކާރަށާއި ރައީސް މުއިއްޒަށް ވަރަށް ބޮޑަށް ފާޑު ކިޔާފަ އެވެ. އެގޮތުން އޭނާ ބުނީ މުހައްމަދު އަމީން ވެސް ކުޅުނީ ދުންފަތާ ކަމަށާއި ރައީސް މުއިއްޒު ވެސް މި ކުޅެނީ ޤާނޫނު އަސާސީއާ ކަމަށެވެ. އެހެން ކަމުން ޤާނޫނު އަސާސީއާއި ކުޅޭނަމަ މުހައްމަދު އަމީންއަށް ވީ ގޮތްވެސް ދިވެހި ލޮބުވެތި ރައްޔިތުންނަށް ފެނިގެން ދާނެ ކަމަށް އޭނާ ބުނެފައިވެ އެވެ.

”މުހައްމަދު އަމީން ވެސް ކުޅުނީ ދުންފަތާ، މީނަ (ރައީސް މުއިއްޒު) މި ކުޅެނީ ޤާނޫނުއަސާސީއާ، މުޙައްމަދު އަމީންއަށް ވީ ގޮތް ވެސް ފެނިގެންދާނެ ދިވެހި ރާއްޖޭގެ ލޮބުވެތި ރައްޔިތުންނަށް، އެހެންވީމަ ޤާނޫނުއަސާސީ ކުޅޭ ކަމަށްވާ ނަމަ، ފެންނާނެ ރީތި ކެއްސެއް ލިބިގެންދާނެ.“ އަބްދުއްރަޙްމާން ބުންޏެވެ.

މި މައްސަލަ ކުރިމަތިވެފައިވަނީ އެމްޑީޕީން ޤާނޫނުއަސާސީގެ ދިފާއުގައި ނަމުގައި މާލޭގައި ބޮޑު އެއްވުމެއް ބޭއްވުމަށް ތައްޔާރުވަމުންދާ ދަނޑިވަޅެއްގަ އެވެ. މި އެއްވުން އޮންނާނީ މި މަހުގެ 10 ވާ އަންގާރަ ދުވަހުގެ ރޭގަ އެވެ.

މިދިޔަ ހަފްތާގައި ސޯޝަލް މީޑިއާގައި މީހަކު "ކައްޒާބު" އަށް ނިސްބަތްކޮށް ކުރި ޕޯސްޓެއްގައި މީހަކަށް އިންޒާރުދީ ބިރުދައްކާކަމަށް ބުނެ ވަނީ ފުލުހަށް ހާޒިރުކޮށްފަ އެވެ.