މަސްވެރިންގެ ދުވަސް ފާހަގަކުރުމަށް މިއަހަރު ބާއްވަން ފެށި "ރަހަވަރު" ކެއްކުމުގެ މުބާރާތް ކުރިއަށްއޮތްތަނުގައި މުޅި ރާއްޖޭގައި ކުރިއަށްގެންދިއުމަށް އަމާޒު ހިފާފައިވާ ކަމަށް މަސްވެރިކަމަށް ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެ އެވެ.

މިނިސްޓަރު އަހްމަދު ޝިޔާމް މިފަދައިން ވިދާޅުވީ މިއަހަރުގެ މަސްވެރިންގެ ދުވަސް ފާހަގަކުރުމަށް އެ ވުޒާރާއިން އިންތިޒާމްކޮށްގެން ބޭއްވި "ރަހަވަރު" ކެއްކުމުގެ މުބާރަތް ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

"ރަހަވަރު" ކެއްކުމުގެ މުބާރާތަކީ މިއަހަރުގެ މަސްވެރިންގެ ދުވަސް ފާހަގަކުރުމަށް ބޭއްވި ފުރަތަމަ ހަރަކާތެވެ. މި މުބާރާތުގައި 7 ޓީމަކުން 35 އަށްވުރެ ގިނަ މީހުން ބައިވެރިވިއިރު، މި މުބާރާތުގައި ކެއްކި ތަކެތި ތައްޔާރުކޮށްފައިވަނީ ފަރުމަހާއި މުށިމަސް ބޭނުންކޮށްގެންނެވެ.

"ރަހަވަރު" ކެއްކުމުގެ މުބާރަތް ނިންމުމުގެ ރަސްމިއްޔާތުގައި ވާހަކަފުޅުދައްކަވަމުން ޝިޔާމް ވިދާޅުވީ މިއަހަރު ކެއްކުމުގެ މުބާރާތް ޢާންމުންނަށް ހުޅުވާލައިގެން ބޭއްވި ނަމަވެސް، އަންނަ އަހަރު ސްކޫލް ދަރިވަރުންނަށް އަމާޒުކޮށްގެން މުބާރަތް ބޭއްވުމުގެ ވިސްނުންފުޅު ގެންގުޅުއްވާކަމަށެވެ.

އަދި މީގެއިތުރުން ކުރިއަށްއޮތްތަނުގައި ވީހާވެސް ގިނަ ބަޔަކު ބައިވެރިވާގޮތަށް، އަތޮޅުތެރޭގެ ރަށްތަކުގައި ބޭއްވުމުގެ ވިސްނުން ގެންގުޅުއްވާކަންމަށްވެސް ވަޒީރު ޝިޔާމް ވިދާޅުވި އެވެ.

މިއަހަރުގެ މަސްވެރިންގެ ދުވަސް ފާހަގަކުރުމަށްވެސް ގިނަ ހަރަކާތްތަކެއް ބާއްވާނެކަން ހާމަކުރައްވާ ޝިޔާމް ވިދާޅުވީ މިއަހަރުގެ މަސްވެރިންގެ ދުވަސް ފާހަގަކުރުމަށް އާޓް އެގްޒިބިޝަނެއް ވެސް ބާއްވަން ހަމަޖެހިފައި ވާކަމަށާއި އަދި މަސްވެރިންގެ ގުންޒަރާއި މަސްރޭސްވެސް ބޭއްވުމަށް ނިންމާފައިވާ ކަމަށެވެ.

"މިއަހަރުގެ މަސްވެރިންގެ ދުވަސް ފާހަގަކުރުމަށް އިތުރު ގިނަ ހަރަކާތްތަކެއް ވަނީ ރޭވިފަ. އޭގެ ތެރޭގަ އާޓް އެގްޒިބިޝަނެއް ބާއްވަން ވަނީ ހަމަޖެހިފައި. އަދި މަސްވެރިންގެ ގުންޒަރާއި މަސްރޭސްވެސް އޮންނާނެ. ޖަލްސާ އޮންނަނީ އަންނަ ހުކުރު ދުވަހުގެ ރޭ ދަރުބާރުގޭގައި" ވަޒީރު ވިދާޅުވި އެވެ.

"ރަހަވަރު" ކެއްކުމުގެ މުބާރާތުން 1 ވަނަ ލިބުނީ ފަތްމިނި ކަމަނަ ޓީމަށެވެ. "ޓީމް ފުޑް ބަޑީސް"އަށް ދެވަނަ ލިބިފައިވާއިރު 3 ވަނަ ލިބުނީ "ޓީމް ނޯޑިކް ބައިޓްސް"އަށެވެ. މުބާރާތުގެ 1 ވަނައަށް އައި ޓީމަށް ފައިސާގެ އިނާމްގެ ގޮތުގައި 10،000 ރުފިޔާ ދީފައިވާއިރު ދެވަނައަށް 7،000 ރުފިޔާ އަދި 3 ވަނައަށް 5،000 ރުފިޔާވަނީ ދީފަ އެވެ.

މަސްވެރިކަމާބެހޭ ވުޒާރާއިން ބުނިގޮތުގައި މަސްވެރިންގެ ދުވަހަށް ހާއްސަކޮށް ކެއްކުމުގެ މުބާރާތެއް ބޭއްވުމުގެ ބޭނުމަކީ އެކި ބާވަތުގެ ކަނޑު މަހުން އުފައްދާ އުފެއްދުންތައް އިތުރުކުރުމަށް ބާރުއަޅައި، އެކަމަށް ލޯބި ޖެއްސުން ކަމަށެވެ.

އަދި މަސްވެރިކަމުން އުފައްދާ ކާނާގެ ބާވަތްތައް އިތުރުކުރުމަކީ މަސްވެރިކަމުގެ ސިނާއަތް ސިންދަފާތުކުރުމަށް މުހިންމު ކަމެއްކަންވެސް އެ ވުޒާރާއިން ފާހަގަކުރައްވަ އެވެ.