މިފްކޯގެ ސީއީއޯ/އެމްޑީގެ މަގާމަށް ސްވިޓްޒަލެންޑުގެ ޑރ. ވިޓާލީ ލުބިމޯވް އައްޔަންކޮށްފި އެވެ.

ސަރުކާރުގެ މަސް ކުންފުނި، މިފްކޯގެ ސީއީއޯގެ މަގާމަށް ޑރ. ވިޓާލީ އައްްޔަންކުރިއިރު، އޭނާ ވަނީ މިއަދު އެ ކުންފުނީގެ މަސައްކަތާ ރަސްމީކޮށް ހަވާލުވެވަޑައިގެންފަ އެވެ.

މަސްވެރިން ބާނާ މަހަށް ފައިސާ ދެއްކުމުގެ މައްސަލަތަކެއް ކުރިމަތިވެފައިވާ ކުންފުނިން ބުނީ ޑރ. ވިޓާލީ އަކީ އެ ދާއިރާގައި 20 އަހަރަށް ވުރެ ގިނަ ދުވަހު މަސައްކަތް ކުރައްވާފައިވައި ތަޖުރިބާ ލިބިފައިވާ ޓްރެޓީޖިކް ކްރައިސިސް މެނޭޖްމެންޓުގެ ދާއިރާގެ ސްޕެޝަލިސްޓެއް ކަމަށެވެ.

ސަރުކާރުގެ މަސް ކުންފުނީގެ ސީއީއޯގެ މަގާމަށް ފުރަތަމަ ފަހަރަށް ރާއްޖެ އިން ބޭރުގެ ބޭފުޅަކު މި އައްޔަންކުރިއިރު، މި މަގާމަށް ބޭފުޅަކު ހޯދުމަށް މީގެ ކުރިން ވަނީ ދެފަހަރެއްގެ މަތިން އިއުލާން ވެސް ކޮށްފަ އެވެ. އެގޮތުން މިފްކޯގެ ސީއީއޯގެ މަގާމަށް މީހަކު ހޯދަން އެންމެ ފަހުން އިއުލާންކުރީ މި އަހަރުގެ ސެޕްޓެމްބަރު މަހު އެވެ.

ޕްރައިވަޓައިޒޭޝަން އެންޑް ކޯޕަރޭޝަން ބޯޑު (ޕީސީބީ) އިން ކުރި އިއުލާނުގައިވާ ގޮތުން އެ މަގާމުގެ މުސާރައިގެ ގޮތުގައި ކޮންމެ މަހަކު 12،000 ޑޮލަރު (185،040ރ.) އާއި 15،000 ޑޮލަރު (231،300ރ.) ދެމެދުގެ މުސާރައެއް ލިބޭނެ އެވެ. އެ މަގާމުގެ މުއްދަތަކީ ހަތަރު އަހަރެވެ.

މިފްކޯގެ ސީއީއޯގެ މަގާމު ހުސްވީ މި ސަރުކާރުން އެ މަގާމަށް އައްޔަންކުރި އަހުމަދު ސަމާހު ރަޝީދު ވަކިކުރަން ޕީސީބީން ނިންމުންނެވެ. ސަމާހް ވަކިކުރީ ޕީސީބީއަށް ހުށަހެޅި ޝަކުވާތަކާ ގުޅިގެން ސަސްޕެންޑު ވެސް ކުރުމަށް ފަހު އެވެ.