މިހާރު ސިނަމާތަކުގައި ދައްކަމުން އަންނަ ފިލްމު "ޕުޝްޕާ 2: ދަ ރޫލް"ގެ ޕްރޮޑިއުސަރަށް އިންޑިއާގެ ކޮމިއުނިޓީއެއް ކަމަށްވާ ރާޖުޕުތު ކޮމިއުނިޓީއިން އިންޒާރު ދީފި އެވެ.

ހަބަރުތައް ބުނާ ގޮތުގައި ޕުޝްޕާގެ ޕްރޮޑިއުސަރަށް އެ ކޮމިއުނިޓީއިން އިންޒާރު ދީފައިވަނީ ހިންދޫ ދީނުގެ ވަކި މަޒްހަބެއް ކަމަށްވާ "ކްޝަތުރިޔާސް"އަށް ނިސްބަތްވާ ނަމެއް ކަމަށްވާ "ޝެކާވަތު" އެ ފިލްމުގައި ބޭނުން ކޮށްފައިވާ ގޮތުންނެވެ.

"ޝެކާވަތު"އަކީ އެ ފިލްމުގެ ނެގެޓިވް ލީޑު ކުޅޭ އެކްޓަރަށް ދީފައިވާ ނަމަށްވާއިރު ފިލްމުގެ ތެރެއިން އެ ނަން ވަރަށް ގިނަ ފަހަރު ބޭނުން ކޮށްފައިވެ އެވެ.

އެކްސްގައި ރާޖްޕުތު ކޮމިއުނިޓީގެ ލީޑަރު ރާޖު ޝެކާވަތު އާއްމުކުރި ވީޑިއޯއެއްގައި ބުނެފައިވަނީ އެ ނަން ފިލްމުގައި ބޭނުންކުރުން ހުއްޓާލަން ޖެހޭ ކަމަށާއި ނޫންނަމަ ނަތީޖާ ރަނގަޅު ނުވާނެ ކަމަށެވެ.

"ކްޝަތުރިޔާސްއަށް މަލާމާތް ކުރުމުގެ ގޮތުން ފިލްމުގައި 'ޝެކާވަތު' ބޭނުންކޮށްފައި ވަނީ ނުބައި ގޮތަކަށް. މިކަން ހުއްޓާނުލައިފިނަމަ ޕްރޮޑިއުސަރަށް ވަރަށް ގެއްލުން ލިބޭނެ،" ރާޖް ބުންޏެވެ.

ރާޖް އިތުރަށް ބުނީ އެކަން ހާސިލްކުރަން ކުރަން ޖެހުނު ކޮންމެ ކަމެއް ވެސް ކުރާނެ ކަމަށާއި އެކަމުގައި އެއްވެސް ވަރަކަށް ފަސް ނުޖެހޭނެ ކަމަށެވެ.

ޕުޝްޕާ 2 އަށް ބޮކްސް އޮފީހުގައި ބޮޑު ކާމިޔާބެއް ލިބެމުން އަންނައިރު، އެ ފިލްމަށް އާއްމުންގެ ސަމާލުކަން ވަނީ ވަރަށް ބޮޑަށް ލިބިފަ އެވެ.

އެގޮތުން ހައިދަރްއާބާދުގައި އޮތް އެ ފިލްމުގެ ޕްރިމިއާގެ ތެރެއިން ހިނގި ތޮއްޖެހުމުގެ ހާދިސާއެއްގައި އެތަނަށް ދިޔަ އަންހެނަކު ވަނީ މަރުވެސް ވެފަ އެވެ.