ހަކުރު އެކުލެވޭ އެކި ކެއުންތަކާއި ބުއިންތަކުން ހަށިގަނޑަށް ކުރާ އަސަރު ތަފާތުވާ ކަމަށް ސްވިޑަންގައި ހެދި ދިރާސާއަކުން ހާމަވެއްޖެ އެވެ.

20 އަހަރު ތެރޭގައި 70،000 މީހުންގެ ހަށިގަނޑުން މައުލޫމާތު ނަގައިގެން ކުރެވިފައިވާ އެ ދިރާސާއިން އެނގުނު ގޮތުގައި އެކި ކެއުންތަކުގައި ހަކުރު ބޭނުން ކުރެވިފައިވާ ގޮތުން އެއިން ހަށިގަނޑަށް ކުރާ އަސަރު ތަފާތުވެ އެވެ. އެގޮތުން ހަށިގަނޑަށް އެންމެ ނުރައްކާތެރި ހަކުރު އެކުލެވޭ ބާވަތަކީ އެނާޖީ ބުއިންތަކާއި ފިޒީ ބުއިންތައް ކަމަށް އެ ދިރާސާގައި ބުނެފައިވެ އެވެ.

ސަބަބަކަށް ވަނީ ހަރު ކާތަކެއްޗާ ހިލާފަށް ދިޔާ ތަކެތިން ބަނޑު ފުރޭ މިންވަރު ކުޑަވުމާއެކު އެކަށީގެންވާ މިންވަރަށް ވުރެ ގިނައިން ބޭނުން ކުރެވުމުގެ ފުރުސަތު ބޮޑުވުމެވެ.

އެހެން ނަމަވެސް މާމުއާއި ފޮނި ޕޭސްޓްރީޒް ފަދަ ކެއުންތަކުން ހަށިގަނޑަށް ލިބޭ ގެއްލުން ނިސްބަތުން ކުޑަ ކަމަށް އެ ދިރާސާގެ ހޯދުންތަކުން ހާމަވެ އެވެ.

އެއާއެކު ހަކުރު އެކުލެވޭ ކެއުންތައް އެއްކޮށް ހުއްޓާލުމުގެ ބަދަލުގައި ވަކި މިންގަނޑެއްގެ ތެރެއިން ކޮންމެވެސް ވަރަކަށް އެފަދަ ކާއެއްޗެހި ކެއުމަކީ ސިއްހަތަށް ފައިދާހުރި ކަމެއް ކަމަށް ވެސް ދިރާސާގައި ފާހަގަކޮށްފައިވެ އެވެ.