ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް 48 ގަޑިއިރުތެރޭ މަސްވެރިންނަށް ދިން ފުރަތަމަ ޕޭމަންޓު މިއަދު ޖަމާކޮށްފައިވާކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.

ޝިޔާމް މިފަދައިން ވިދާޅުވީ މިއަދު އެކްސްގައި ކުރެއްވި ޕޯސްޓެއްގައި އެވެ.

އެކްސްގައި ކުރެއްވި ޕޯސްޓުގައި މިނިސްޓަރ ޝިޔާމް ވިދާޅުވީ މިދިޔަ އާދިއްތަ ދުވަހު މަސްވެރިން ކިރި މަހަށްވާ 2،045،823.37 ރުފިޔާ މިއަދު މިފްކޯއިން މަސްވެރިންނަށް ޖަމާކޮށްފައި ވާކަމަށެވެ.

މިއީ ހޯމަ ދުވަހު މަސްވެރިންގެ ޕޭމަންޓުގެ ބެކްލޮގު ސާފުކުރިއިރު ޑިސެމްބަރު ހަތްވަނަ ދުވަހު ބޭނިމަހުގެ ޕޭމަންޓު ހިމެނޭގޮތަށް ދެއްކި ޕޭމަންޓުގެ ފަހުން ފުރަތަމަ ފަހަރަށް 48 ގަޑިއިރުތެރޭ މަސްވެެރިންގެ ފައިސާ ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް ޖަމާކުރެވުނު ތާރީޚީ ދުވަސް ކަމަށް ވެސް މިނިސްޓަރުގެ ވިދާޅުވި އެވެ.

"މިއީ އިއްޔެ މަސްވެރިންގެ ޕޭމަންޓުގެ ބެކްލޮގު ސާފުކުރިއިރު ޑިސެމްބަރު ހަތްވަނަ ދުވަހު ބޭނިމަހުގެ ޕޭމަންޓު ހިމެނޭގޮތަށް ދެއްކި ޕޭމަންޓުގެ ފަހުން ފުރަތަމަ ފަހަރަށް 48 ގަޑިއިރުތެރޭ މަސްވެެރިންގެ ފައިސާ ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް ޖަމާކުރެވުނު ތާރީޚީ ދުވަސް،" މިނިސްޓަރުގެ ޕޯސްޓުގައި ވިދާޅުވި އެވެ.

މި ޕޯސްޓުގައި ޝިޔާމް ވަނީ 44 ވަނަ މަސްވެރިންގެ ދުވަހުގެ ހެޔޮއެދުމާއި ތަހުނިޔާ ދިވެހި މަސްވެރި އާއިލަތަކަށް އަރިސްކޮށްފަ އެވެ.

މަސްވެރިން މަސް ކިރާތާ 48 ގަޑިއިރު ތެރޭ ފައިސާ ދިނުމަކީ ރައީސްގެ ރިޔާސީ ވައުދުފުޅަކަށް ވާއިރު، މާލެ އަތޮޅުގެ ބައެއް ރަށްރަށަށް ކުރައްވަމުން ގެންދަވާ ދަތުރުފުޅުގެ ތެރެއިން ހޯމަ ދުވަހު ކ. ގާފަރަސް ވަޑައިގެން އެ ރަށުގެ ރައްޔިތުންނާ ބައްދަލުކުރައްވާ ވާހަކަފުޅުދައްކަވަމުން ރައީސް ވިދާޅުވީ، ބީއެމްއެލްގައި އެކައުންޓް ހުޅުވާފައިވާ މަސް ދޯނިތަކުން މަސް ކިރާތާ 48 ގަޑިއިރު ތެރޭ ފައިސާ ޖަމާކުރަން ބީއެމްއެލާ އެކު އެއްބަސްވުމެއްގައި ސޮއިކޮށްފައިވާ ކަމަށެވެ.

އެހެންވެ، މިއަދުން ފެށިގެން ބީއެމްއެލްގައި އެކައުންޓު ހުޅުވާފައިވާ ދޯނިތަކަށް 48 ގަޑިއިރު ތެރޭ ބިލަށް ފައިސާ ޖަމާވާނެ ކަމަށް އެ މަނިކުފާނު ވިދާޅުވިއެވެ.

ރައީސް ވިދާޅުވީ، މިހާތަނަށް މަސްވެރިންނަށް ނުދެވި ހުރި 38 މިލިއަން ރުފިޔާ ވެސް އިއްޔެ ޖަމާކޮށްފައިވާ ކަމަށާއި އެއީ، މިދިޔަ ދެ ހަފުތާ ތެރޭގައި ދޭންޖެހިފައި ހުރި ފައިސާކަމަށެވެ.

މަސްވެރިންނަށް 48 ގަޑިއިރު ތެރޭ ފައިސާ ދޫކުރަނީ ފިނޭންސް މިނިސްޓްރީއާއި މިފްކޯއާއި ބީއެމްއެލާ އެކު ހެދި އެއްބަސްވުމެއްގެ ތެރެއިންނެވެ.