މިދިޔަ އަހަރަށް ވުރެ މިއަހަރު ސައިބާ ކްރައިމްގެ މައްސަލަތައް ދެގުނަ އިތުރުވެފައިވާ ކަމަށް ކޮމިޝަނަރު އޮފް ޕޮލިސް އަލީ ޝުޖާއު ވިދާޅުވެއްޖެ އެވެ.

ފުލުހުން ފެށި ސައިބާ އެކްސްޕޯ ހުޅުވުމުގެ ރަސްމިއްޔާތުގައި ވާހަކަ ދައްކަވަމުން ސީޕީ ޝުޖާއު ވިދާޅުވީ މިދިޔަ އަހަރު ފުލުހުންނަށް ރިޕޯޓްްކުރީ ސައިބާ ކްރައިމްގެ 99 މައްސަލަ ކަމަށާއި ނަމަވެސް މި އަހަރުގެ މިހާތަނަށް 177 މައްސަލަ ހުށައަޅާފައިވާ ކަމަށް ވިދާޅުވި އެވެ. އަދި އެ މައްސަލަތައް ތަހުގީގުކުރަމުން އަންނަ ކަމަށް ވެސް ސީޕީ ވިދާޅުވި އެވެ.

ޝުޖާއު ވިދާޅުވީ މިއަހަރު އެންމެ ގިނައިން ފުލުހުންނަށް ރިޕޯޓްކޮށްފައިވަނީ ހެކްކުރުމުގެ މައްސަލަތައް ކަމަށާއި މިގޮތުން އެންމެ ގިނައިން ރިޕޯޓް ކުރީ ބޭންކް އެކައުންޓްތަކާއި ސޯޝަލް މީޑިއާ އެކައުންޓުތައް ހެކް ކުރުމުގެ މައްސަލަތައް ކަމަށެވެ. މީގެ އިތުރުން ވަގި ލިޔުންތައް އުފެއްދުމާއި، އޮންލައިން ވިޔަފާރީގެ ނަމުގައި ސޯޝަލް މީޑިއާގައި ޕޭޖުތައް ހަދައި، މަކަރާ ހީލަތުން އޮޅުވާލައިގެން ފައިސާ ހޯދުން ހިމެނޭކަންވެސް ސީޕީ ފާހަގަކުރެއްވި އެވެ.

ޝުޖާއު ވިދާޅުވީ ސޯޝަލް މީޑިއާ މެދުވެރިކޮށް ސްކޭމްކޮށްގެން ފައިސާ ހޯދަމުންދާ މައްސަލަތައް ދުވަހަކަށް ވުރެ ދުވަހެއް އިތުރުވަމުންދާ ކަމަށެވެ. ސައިބަ ސެކިއުރިޓީއަށް އަހުލުވެރި ކުރުވުމުގެ ގޮތުން ފުލުހުން ފެށި "ސައިބަ އެކްސްޕޯ 2024" ކުރިޔަށް ދަނީ ހުޅުމާލެ ސެންޓަރަލް ޕާކުގަ އެވެ.

މާދަމާގެ ނިޔަލަށް ކުރިޔަށްދާ މި އެކްސްޕޯގައި ސަރުކާރުގެ މުއައްސަސާތަކާއި ކުންފުނިތަކުގެ އިތުރުން އަމިއްލަ ކުންފުނިތަކާއި ކަމުގެ ފަންނީ މީހުން ބައިވެރިވެ މައުލޫމާތުދޭ ގޮތަށް ވަނީ ހަމަޖެހިފަ އެވެ.