ކުރީގެ ފިނޭންސް މިނިސްޓަރު ޑރ. މުހައްމަދު ޝަފީގު، ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ)ގެ ޑިރެކްޓަރުންގެ ބޯޑަށް އައްޔަންކޮށްފި އެވެ.

ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑް (ޕީސީބީ)ގެ ވެބްސައިޓުން އެނގޭގޮތުން އެޗްޑީއެފްސީގެ ބޯޑަށް ޝަފީގް އައްޔަންކޮށްފައިވަނީ މި މަހުގެ ދެވަނަ ދުވަހު އެވެ. ޝަފީގަކީ ބޯޑު މެންބަރެއްކަން އެޗްޑީއެފްސީގެ ވެބްސައިޓުގައިވެސް ބުނެފައިވެ އެވެ.

މި ސަރުކާރުގެ ފުރަތަމަ ފިނޭންސް މިނިސްޓަރު ޝަފީގު ވަނީ ކުރިން އެޗްޑީއެސްފީގެ ޗީފް ފައިނޭންޝިއަލް އޮފިސަރު (ސީއެފްއޯ)ގެ މަގާމު ވެސް 2021 އިން 2023 އަށް އަދާކުރައްވައިފަ އެވެ.

ރައީސް މުހައްމަދު މުއިއްޒުގެ ކެބިނެޓަށް މިދިޔަ ސެޕްޓެމްބަރު މަހުގެ 30 ވަނަ ދުވަހު ގެނައި ބަދަލުތަކަކާ އެކު، ފިނޭންސް މިނިސްޓަރުގެ މަގާމުން ޝަފީގު ވަނީ އިސްތިއުފާ ދެއްވާފަ އެވެ.

އެޗްޑީސީގެ ބޮޑެތި ހިޔާނާތުގެ މައްސަލަތަކެއް ފަޅާއެރުމާއެކު އެ ކުންފުނީގެ ޗެއާމަން ފިޔަވާ ކުރިހާ ބޯޑް މެންބަރުން ވަނީ ސަސްޕެންޑްކޮށްފަ އެވެ. އޭގެ ތެރޭގައި އެމްޑީ ފަޒުލް ވެސް ހިމެނެ އެވެ. އޭގެފަހުން ރޭގެ ވަގުތެއްގައި ފަޒުލް ވަނީ މަގާމުން އިސްތިއުފާ ދެއްވާފަ އެވެ.