އިޒްރޭލުގެ ގައުމީ ސަލާމަތާ ބެހޭ ވަޒީރު އިޓަމަރް ބެން ގަވިރް މަސްޖިދުލް އަގުސާއަށް ވަނުމަކީ އެ މިސްކިތުގެ ހުރުމަތްކެނޑުންކަމަށް ބުނެ އެ އަމަލު ރާއްޖެއިން ކުށްވެރިކޮށްފި އެވެ.

ފޮރިން މިނިސްޓްރީން މިކަމާއި ގުޅިގެން މިއަދު ނެރުނު ބަޔާނުގައި ބުނެފައިވަނީ ބެން ގްވިރްގެ އަމަލަކީ އިސްލާމީ މުގައްދަސް ބިނާތަކުގެ ހުރުމަތްކަނޑައިލުމަށް ހިންގާފައިވާ އަމަލެއް ކަމަށެވެ. އަދި އެއީ އިސްލާމީ ބިނާތަކުގެ ތާރީހީ ހައިސިއްޔަތު ބަދަލުކުރުމަށް އިޒްރޭލުން ތަކުރާރުކޮށް ކުރަމުން އަންނަ މަސައްކަތްތަކުގެ ތެރެއިން ކަމެއްކަމަށް ބަޔާނުގައި ބުނެފައިވެ އެވެ.

މިފަދަ އަމަލުތަކަކީ ބައިނަލްއަގުވާމީ ގާނޫނާ ކަނޑައެޅިގެން ހިލާފު އަމަލުތަކެއް ކަމަށާއި އަދި މި އަމަލަކީ ފަލަސްތީނު ރައްޔިތުންގެ އިތުރަށް ދުނިޔޭގެ ދެ ބިލިއަނަށްވުރެ ގިނަ މުސްލިމުންގެ ހައްގުތަކަށްވެސް އަރައިގަތުމެއްކަމަށް ސަރުކާރުން ބުނެފައިވެ އެވެ.

މިފަދަ އަނިޔާވެރި އަމަލުތައް ހިންގުން ހުއްޓުވުމަށާއި ބައިނަލްއަގުވާމީ ގާނޫނުތަކާއި އިންސާނީ ހައްގުތަކަށް އިހުތިރާމުކުރުން ކަށަވަރު ކުރުމަށް ހަރުދަނާ، އަވަސް ފިޔަވަޅުތަކެއް އެޅުމަށް ބައިނަލްއަގުވާމީ މުޖުތަމައަށް ރާއްޖެއިން ގޮވާލާފައިވެ އެވެ.

ބަޔާނުގައި އިތުރަށް ބުނެފައިވަނީ ފަލަސްތީނު މައްސަލައަށް އޮތް ދާއިމީ ސުލްހަވެރި ހައްލަކީ 1967 ވަނަ އަހަރުގެ ކުރިން އޮތް އިންތަކުގެ މަތީގައި، އިރުމަތީ ގުދުސްގައި ވެރިރަށް ގާއިމުވެފައި އޮތް، ސިޔާދަތީ ބާރު ފުރިހަމައަށް ލިބިފައިވާ ފަލަސްތީނުގެ ދައުލަތެއް ގާއިމުކޮށްދިނުން ކަމަށެވެ.