މި ފެށޭ އާ އަހަރާ ދިމާކޮށް ޑިސެމްބަރު 31 ވަނަ ދުވަހުން ފެށިގެން ފަސް ދުވަހަށް ބޭންކް އޮފް މޯލްޑިވްސް އާއި މޯލްޑިވްސް އިސްލާމިކް ބޭންކް ބަންދުވާނެ ކަމަށް އެ ދެ ބޭންކުން ބުނެފި އެވެ.

މިކަން ހާމަކޮށް އެ ދެ ބޭންކުން ބުނީ މިމަހުގެ 31 ވަނަ ދުވަހުން ފެށިގެން އެ ދެ ބޭންކް ބަންދުވާނެ ކަމަށާއި ދެން ހުޅުވޭނީ އަންނަ ޖެނުއަރީ 5 ގައި ކަމަށެވެ. އެހެންކަމުން ދުރާލާ ކަންކަން ނިންމެވުމަށް އެ ބޭންކްތަކުން ވަނީ ކަސްޓަމަރުންގެ ކިބައިން އެދިފަ އެވެ.

ބީއެމްއެލްއިން ބުނީ މި މުއްދަތުގެ ތެރޭގައި ބީއެމްއެލް ބަންދުވީ ނަމަވެސް އިންޓަނެޓް އަދި މޯބައިލް ބޭންކިންގެ ޚިދުމަތާއި، ސެލްފް ސާވިސް އޭޓީއެމް އަދި ކަސްޓަމާ ސަޕޯޓް ސާވިސްގެ ޚިދުމަތް ލިބެން ހުންނާނެ ކަމަށެވެ.

އެމްއައިބީން ބުނީ ބޭންކް ބަންދުވާ މުއްދަތުގައި އީ- ބޭންކިން އާއި، އޭޓީއެމްގެ އިތުރުން ކަސްޓަމާ ކެއާ ސެންޓަރުގެ ޚިދުމަތް ލިބެން ހުންނާނެ ކަމަށެވެ.