މި މަހު އެކަނި ވެލާނާ އިންޓަނޭޝަނަލް އެއާޕޯޓަށް 148 ޖެޓް ޖައްސާފައިވާ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މިއަދު ބުނެފި އެވެ.

އެމްއޭސީއެލް އިން ބުނީ އެ ކުންފުނިން ހިންގާ ވީއައިއޭގައި މިވަގުތު 30 ޕްރައިވެޓް ޖެޓު ޕާކުކޮށްފައި އެބައޮތް ކަމަށެވެ. އަދި މި މަހުގެ ތެރޭގައި އިއްޔެގެ ނިޔަލަށް 148 ޖެޓް މޫވްމަންޓްސް ރެކޯޑުކުރެވިފައިވާ ކަމަށް ވެސް އެ ކުންފުނިން ބުންޏެވެ.

މިއީ މިދިޔަ އަހަރުގެ ޑިސެމްބަރު މަހުގެ 28ވަނަ ދުވަހުގެ ނިޔަލަށް ރެކޯޑުކުރެވުނު 137 މޫވްމަންޓަށް ވުރެ، 11 މޫވްމަންޓު އިތުރުވުމެކެވެ. މިދިޔަ އަހަރާ އަޅައި ބަލާއިރު، އެއީ އަށް ޕަސެންޓްގެ އިތުރުވުމެކެވެ.

މިދިޔަ އަހަރުގެ ޑިސެމްބަރު 28ވަނަ ދުވަހުގެ ނިޔަލަށް ރެކޯޑުކުރެވިފައި ވަނީ ޖެޓްގެ 2،107 މޫވްމަންޓެވެ. ނަމަވެސް މި އަހަރު، މިހާތަނަށް 2،326 ޖެޓު މޫވްމަންޓު ރެކޯޑުކުރެވިފައިވެ އެވެ. މިއީ 10 ޕަސެންޓް އިތުރުވުމެކެވެ.

https://hurihaa.mv/gallery/205

މި ދުވަސްވަރު ޖެޓްތައް އައުން އިތުރުވެފައިވާތީ އެއާޕޯޓުގެ ތިން ސަރަހައްދެއްގައި ޖެޓު ޕާކުކުރެވޭނެ އިންތިޒާމު ވަނީ ހަމަޖައްސާފަ އެވެ. އެގޮތުން އެއާޕޯޓުގެ އުތުރާއި، އިރު، އަދި ދެކުނުން ޖުމްލަ 68 ޖާގަ ޖެޓު ޕާކިންއަށް ޚާއްސަކޮށްފައިވާ ކަމަށް އެމްއޭސީއެލް އިން ބުންޏެވެ.

ޖެޓްތައް އިތުރުވެފައިވާއިރު، ގާނޫނަށް ގެނައި އިސްލާހާއެކު ރާއްޖެއިން ބޭރަށް ފުރާ ފަސިންޖަރުންގެ އަތުން ނަގާ ޓެކްސް މި މަހުން ފެށިގެން ވަނީ ބޮޑުވެފަ އެވެ. އެ އިސްލާހުގެ ދަށުން ޕްރައިވެޓު ޖެޓުތަކުގައި ފުރާ ފަސިންޖަރުންގެ އަތުން މިހާރު ނަގަނީ 480 ޑޮލަރެވެ.