ތަނެއް ފަތަހަކުރަން ހިނގާ ފަދައިން ބައެއް މީހުން ހިގާކަން ފާހަގަކުރެވޭ ހެއްޔެވެ؟ ނުވަތަ ތަނަކަށް ދާން ގަޑިޖެހޭތީ ލަސްވެގެން ބާރަށް ދަނީ ކަމަށް ހީވޭ ހެއްޔެވެ؟ ހަގީގަތް ބަލާއިރު އެމީހުންނަކީ އާދައިގެ މަތިންވެސް ހަމަބާރަށް ހިންގާ މީހުންނެވެ.
ސައިކޮލޮޖިސްޓުން ބުނާގޮތުގައި މީހުން ހިނގާ ބާރުމިން ބިނާވެފައިވަނީ އެމީހެއްގެ ޝަޚުސިއްތާއި، އެވަގުތަކު ކުރެވޭ އިހުސާސާއި އަދި ވިސްނުން ހުރިގޮތެއްގެ މައްޗަށެވެ. ބާރަށް ހިނގުމަކީ ވަކި ލަނޑުދަނޑިއެއް ހާސިލް ކުރުމަށްޓަކައި ހަށިގަނޑު ތައްޔާރުވެފައިވާ މިންވަރު އަންގައިދޭ ސިގްނަލެކެވެ. ހަމައެފަދައިން ކަންބޮޑުވެފައިވާކަމާއި ހާސްވެ ނުތަނަވަސްވެފައިވާ ކަން ވެސް ދައްކުވައިދޭ ކަމެކެވެ.
މީހުން އާންމުކޮށް ހިނގާ ސްޕީޑް ދިރާސާކުރާ ސައިކޮލޮޖިސްޓުން ފާހަގަކުރާ އެއްކަމަކީ ހިނގުމުގެ އާންމު ސްޕީޑާއި އެމީހެއްގެ ނަފްސާނީ ދުޅަހެޔޮކަމާއި ގުޅިފައިކަމެވެ. އާންމުކޮށް މީހަކު ބާރަށް ހިނގާނަމަ، އެއިން އަނގައިދެނީ ނަފްސާނީ ގޮތުން އެމީހަކު ދުޅަހެޔޮ މިންވަރެވެ. އެއީ މީހުންނާ ގުޅޭ ސޯޝަލްވާ ހިތްވާ މީހުންނެވެ. އެމީހުންނަކީ ހަލަބޮލި އަދި ހަށިގަނޑުގައި ހަކަތަ ގިނަ މީހުންނެވެ.
ސައިކޮލޮޖިސްޓުން ބުނާގޮތުގައި އަވަހަށް ހިނގާ މީހުންނަކީ ވަކި ލަނޑުދަނޑިއަކަށް މަސައްކަތް ކުރާ، މަސައްކަތުގައި ނިންމުންތައް އަވަހަށް ނިންމާ ބޭކާރު ކަންތައްތަކާއި ދުރު، ހަރަކާތްތެރި މީހުންނެވެ. އެފަދަ މީހުންނަކީ ރޭވުންތެރި، ހީވާގި އަދި ކަންކަމަށް ފުންކޮށް ވިސްނާ ބައެކެވެ.
ހިނގުން އަވަސްނަމަ އަނގައިދެނީ އަބަދުވެސް ކޮންމެވެސް ކަމެއްގައި މަޝްއޫލުވެގެން ހުންނަ ކަމެވެ.
ބަލާބެލުމަށް އެފަދަ މީހުންނަކީ ކެރޭ، ކުޅަދާނަ އަދި އަޒުމް ވަރުގަދަ މީހުންގެ ގޮތުގައި ވެސް ފާހަގަވާނެ އެވެ. އޭގެ ސަބަބުން ޕްރޮފެޝަނަލް މަސައްކަތްކުރާ ތަންތާންގައި އެ މީހުންގެ ރޯލު ވަރަށް ބޮޑެވެ.
ކެތްތެރިކަންކުޑަ ބައެއް
ބާރަށް ހިނގާ މީހުންގެ އަވަސްކަމާއި، ހަރަކާތްތެރި ކަމުގެ ސަބަބުން އެމީހުންނަކީ ކެތްތެރިކަން ކުޑަ އަދި އެއްވެސް ކަމެއްގައި ލަސްވުން ބަލައިގަންނަ ބައެއް ނޫނެވެ.
ބާރަށް ހިނގާ މީހުން ގެ ކިބައިން ފެންނަ އަނެއް ސިފައަކީ ބޭކާރު ގޮތުގައި އެއްވެސް ކަމެއް ނުކުރުމެވެ. އެފަދަ މީހަކު ކޮންމެ ކަމެއްވެސް ކުރާނީ ވަކި މަގްސަދެއް އޮވެގެންނެވެ. ހިނގާފައި ދާނީ ބާރަށް ކަމެއް ކުރުމަށް ފުރިހަމައަށް ތައްޔާރަށް ހުރެ، ވަކި ބޭނުމެއްގަ އެވެ.
ސައިކޮލޮޖިސްޓުން ބުނާގޮތުގައި ފިކުރު ބޮޑުވެގެން އުޅޭ ކަމުގެ އެއްއަލާމާތެއްގެ ގޮތުގައި ބާރަށް ހިނގުން ވެއެވެ. އެއީ ބާރަށް ހިނގުމުން ހަށިގަނޑުގައި ގިނަވެފައިވާ ޓެންޝަނާއި ނާވަސް އެނާޖީ ބޭރުކޮށްލެވޭތީ އެވެ. ވީމާ ވިސްނާކަންކަން ގިނަ ވުމުން ބައެއް މީހުން ބާރަށް ހިނގައެވެ. އެކަމަކީ އިޚްތިޔާރުން ބޭރުކަމެކެވެ. މިސާލަކަށް ގަޑިޖެހޭކަން އިނގޭނަމަ އެތަނަކަށް ދިއުމަށް ބާރަށް ހިނގޭނެ އެވެ. އެކަމުން ދައްކައިދެނީ އަދާކުރަންޖެހޭ ޒިންމާ ތަކުގެ ސަބަބުން މީހާ އަށް ހާސްކަމާއި ކަންބޮޑުވުން ލިބިފައިވާ މިންވަރެވެ.
ބާރަށް ހިނގުމުގެ އިތުރު ސަބަބުތައް
ބާރާއި ނުފޫޒް އަދި ކަންކަމުގައި އަމިއްލަ ކޮންޓްރޯލް ގެންގުޅެން ބޭނުންވާ މީހުން ބާރަށް ހިނގާކަމަށް ސައިކޮލޮޖިސްޓުން ފާހަގަ ކުރެ އެވެ. އެއީ އެމީހުން މިނިވަންކޮށް އުޅެން ބޭނުންވެ އަމިއްލައަށް އިންތިޒާމުތަށް ހިންގަން ބޭނުންވާތީ އެވެ.
ތަފާތު އިހްސާސް ކުރެވޭނަމަ ހިނގުން އަވަސްވެ އެވެ. އެ އިހްސާސްތަކުގެ ތެރޭގައި އުފާ، ރުޅި، ވަރުގަދަ އަޒުމް ހިމެނެ އެވެ. މި އިހުސާސްތަކުގެ ކުޑަބޮޑުމިނަށް ބަލައި ހަށިގަނޑުގައި އުފައްދާ ހަކަތައިގެ ސަބަބުން ހިނގުމުގެ ދުވެލި އަވަސްވެ، ހަރަކާތް އަވަސް ކުރަން މެދުވެރިވާ ކަމަށް ސަކޮލޮޖިސްޓުން ބުނެ އެވެ.
