ވަރަށް ހަގު އުމުރެއްގައި މައިންބަފައިންގެ ކައިވެނި ރޫޅުމުން ދިރިއުޅުމަށް އައި ބަދަލުތަކުގެ ތަޖުރިބާ ބޮލީވުޑްގެ ޒުވާން އެކްޓަރު ޖުނައިދު ޚާން ކިޔައިދީފި އެވެ.

އޮންލައިން ޕޮޑްކާސްޓެއްގައި ވާހަކަ ދައްކަމުން ޖުނައިދު ބުނީ އޭނާގެ ބައްޕަ އާމިރު ޚާންއާއި މަންމަ ރީނާ ދައްތާގެ ކައިވެނި ރޫޅުނީ އޭނާގެ އުމުރުން އެންމެ 8 އަހަރުގައި ކަމަށެވެ.

އެހެން ނަމަވެސް އޭނާގެ އުމުރުން 19 އަހަރު ވަންދެން އޭނާގެ ކުރިމަތީގައި މައިންބަފައިން ޒުވާބުކުރާ މަންޒަރު ނުފެންނަ ކަމަށް ޖުނައިދު ބުނެފައިވެ އެވެ.

"މަންމައާއި ބައްޕަ ފާޅުގައި ޒުވާބުކުރާ މަންޒަރު އަހަންނަށް އެންމެ ފުރަތަމަ ފެނުނީ އަހަރެންގެ އުމުރުން 19 އަހަރުގައި" ޖުނައިދު ބުންޏެވެ.

ޖުނައިދު އިތުރަށް ބުނީ އެ ދެމީހުން ވަރިވެގެން އުޅުނު ނަމަވެސް އޭނާގެ ދިރިއުޅުމުގައި އެ ދެމީހުންގެ ބައިވެރިވުން ވެސް އެއްވަރަކަށް ލިބުނު ކަމަށެވެ.

އެގޮތުން ދަރިން ބެލުމުގެ ކަންކަމުގައި އާމިރުއާއި ރީނާ ވެސް ޒާތީ ކަންކަން އެއް ފަރާތްކޮށް އެކަތިގަނޑެއްގެ ގޮތުގައި މަސައްކަތްކުރި ކަމަށް ޖުނައިދު ބުންޏެވެ.

އާމިރުއާއި ރީނާގެ ކައިވެންޏަށް ދެ ދަރިން ލިބިފައިވާއިރު މިހާރު އުމުރުން 31 އަހަރުގެ ޖުނައިދުއަކީ ދޮށީ ދަރި އެވެ. އޭނާގެ ހަގަށް ހުންނަނީ 27 އަހަރުގެ އިރާ ޚާން އެވެ.