އިންޑިއާގައި ކޮރަޕްޝަންގެ މައްސަލައެއް ރިޕޯޓުކުރި ނޫސްވެރިއެއްގެ ހަށިގަނޑު ޖަންކްޝަން ވަޅުގަނޑެއްގެ ތެރެއިން ފެނިއްޖެ އެވެ.

32 އަހަރުގެ މުކޭޝް ޗަންދްރަކަރް ގެއްލުނީ އައު އަހަރުގެ ފުރަތަމަ ދުވަހު އެވެ. އަދި އޭނާގެ އާއިލާއިން ވަނީ އޭނާ ގެއްލިގެން ފުލުހަށް ރިޕޯޓްކޮށްފަ އެވެ.

މުކޭޝްގެ މޯބައިލް ފޯނު ޓްރެކްކޮށްގެން، އޭނާގެ ހަށިގަނޑު ފެނުނީ ހުކުރު ދުވަހު ބިޖާޕުރު ޓައުން ސަރަހައްދުގައި މަގު ހެދުމުގެ މަސައްކަތްކުރާ ކޮންޓްރެކްޓަރެއްގެ ގޯތިތެރެއިންނެވެ.

މުކޭޝް ޗަންދްރަކަރްގެ ހަށިގަނޑު ފެނުނު ޖަންކްޝަން ވަޅު

މި މަރާ ގުޅިގެން ތިން މީހަކު ވަނީ ހައްޔަރުކޮށްފަ އެވެ. އޭގެ ތެރޭގައި އޭނާގެ ދެ ގާތްތިމާގެ މީހުން ހިމެނޭކަމަށް ރިޕޯޓްތައް ބުނެ އެވެ. މީޑިއާ ވޮޗްޑޮގް އަކުން މި މައްސަލަ ރަނގަޅަށް ތަހުގީގުކުރުމަށް ވަނީ ގޮވާލާފަ އެވެ.

ބިޖާޕުރު ޑިސްޓްރިކްޓުގެ ފުލުހުންނަށް 2 ޖެނުއަރީގައި އެ ގޯތިތެރެއަށް ފުރަތަމަ ގޮސް އެއްވެސް އެއްޗެއް ފެނިފައިނުވެ އެވެ.

ނަމަވެސް، 3 ޖެނުއަރީގައި އިތުރަށް ބެލުމަށްފަހު، ބެޑްމިންޓަން ކޯޓު ކައިރީގައި އަލަށް ކޮންކްރީޓް މަތި އަޅާފައިވާ ޖަންކްޝަނަކުން ވަނީ މުކޭޝްގެ ހަށިގަނޑު ފެނިފައިވާކަމަށް ފުލުހުން ބުނެފައިވެ އެވެ.

ފުލުހުން ބުނާ ގޮތުގައި އޭނާގެ ހަށިގަނޑުގައި އެއްޗަކުން ޖެހުމުގެ ސަބަބުން ލިބޭ ބޮޑެތި އަނިޔާތަކެއް ލިބިފައިވެ އެވެ.

ފްރީލާންސްކޮށް މަސައްކަތްކުރާ މުކޭޝް ވަނީ ސަރުކާރުގެ އިމާރާތްކުރުމުގެ މަޝްރޫޢުތަކުގައި ހިނގާ ކަމަށް ބެލެވޭ ކޮރަޕްޝަނާ ގުޅޭގޮތުން ފުޅާ ދާއިރާއެއްގައި ރިޕޯޓުކޮށްފަ އެވެ.

އޭނާ ހިންގަމުން ގެންދިޔަ "ބަސްތަރު ޖަންކްޝަން" ނަމަކަށް ކިޔާ ޔޫޓިއުބް ޗެނަލެއްވެސް މަޤްބޫލުވެފައިވެ އެވެ.

އޭނާގެ މަރާ ގުޅިގެން، އިންޑިއާގެ ޕްރެސް ކައުންސިލުން ވަނީ މި މައްސަލައިގެ ހަގީގަތްތަކާ ގުޅޭ ރިޕޯޓެއް ސްޓޭޓުގެ ސަރުކާރުން ހޯދުމަށް އެދިފަ އެވެ.

އެ ސްޓޭޓުގެ ޗީފް މިނިސްޓަރު މި މައްސަލަ ތަހުގީގުކުރުމަށް ހާއްސަ ތަހުގީގު ޓީމެއް އެކުލަވާލާފައިވާ ކަމަށް ވިދާޅުވެފަ އެވެ.

އިންޑިއާގެ މީޑިއާގައި ރިޕޯޓުކޮށްފައިވާ ގޮތުގައި، ނޫސްވެރިޔާގެ މަރާ ގުޅިގެން ހައްޔަރުކުރެވުނު މީހުންގެ ތެރޭގައި އޭނާގެ ކޮއްކޮއެއް ހިމެނެ އެވެ.

މައިގަނޑު ޝައްކުކުރެވޭ މީހުންގެ ތެރެއިން އެކަކު ކަމަށްވާ ގޯތީގެ ވެރިފަރާތް ސުރޭޝް ޗަންދްރަކަރްގެ އިތުރުން މުކޭޝްގެ ގާތްތިމާގެ މީހެއް ފިލާފައިވާކަމަށް ފުލުހުންނާއި ހަވާލާދީ އިންޑިއާގެ ބައެއް ނޫސްތަކުން ރިޕޯޓުކޮށްފައިވެ އެވެ.

ސަރަހައްދުގެ ނޫސްވެރިން ވަނީ މި އަމަލު ހިންގި ކަމަށް ތުހުމަތުކުރެވޭ ފަރާތްތަކާމެދު ހަރުކަށި ފިޔަވަޅު އެޅުމަށް އެދި އިހުތިޖާޖުކޮށްފަ އެވެ.

ކޮރަޕްޝަނާއި ތިމާވެށީގެ މައްސަލަތަކާއި ގުޅޭގޮތުން ރިޕޯޓުކުރާ ނޫސްވެރިންނަށް ހަމަލާދިނުމަކީ އިންޑިއާގައި އާންމު ކަމެކެވެ.

މޭ 2022 ގައި، ވެލި ނެގުމުގެ ޣައިރު ޤާނޫނީ މަސައްކަތުގައި ބައިވެރިވާ މީހުންނާ ބެހޭގޮތުން ރިޕޯޓުކުރުމަށް މަޝްހޫރު މިނިވަން ނޫސްވެރިއެއްކަމަށްވާ ސުބްހާޝް ކުމާރް މަހްތޯ، އޭނާގެ ގެ ބޭރުގައި ހުއްޓާ ހަތަރު މީހަކުގޮސް އޭނާގެ ބޮލަށް ބަޑިޖަހާ މަރާލާފައިވެ އެވެ.

މީޑިއާ ވޮޗްޑޮގް "ރިޕޯޓާސް ވިތައުޓް ބޯޑާސް" އިން ބުނެފައިވާ ގޮތުގައި، އިންޑިއާގައި އަހަރަކު އެވްރެޖްކޮށް ތިނެއް ނުވަތަ ހަތަރު ނޫސްވެރިން އެމީހުންގެ މަސައްކަތާ ގުޅިގެން މަރާލެވެ އެވެ. އެހެންކަމުން އިންޑިއާއަކީ މީޑިއާއަށް ދުނިޔޭގެ އެންމެ ނުރައްކާތެރި ޤައުމުތަކުގެ ތެރެއިން އެއް ޤައުމެވެ.