ހިޔާ ފްލެޓް ލިބުނު ސިފައިންނަށް ސިފްކޯ ފްލެޓް ނުދޭން ނިންމުމަށްފަހު، ނިންމުން ބަދަލުކޮށް ފްލެޓް އަލުން ދީފި އެވެ.

އިއްޔެ ސިވިލް ކޯޓުން ކުރި ހުކުމަކުން އެނގޭގޮތުން ހިޔާ ފުލެޓް ލިބުނު ދެ ސިފައިންނަށް ސިފްކޯ ފްލެޓް ނުދޭން އެންއެންޑީއެފުން ނިންމުމުން އެ ދެމީހުން ވަނީ ސިފްކޯއާ ދެކޮޅަށް ދައުވާކޮށްފަ އެވެ.

ކޯޓު ހުކުމުގައި ބުނެފައިވަނީ އެ މީހުން އެ މައްސަލަ އަނބުރާ ގެންގޮސްފައިވާކަމަށެވެ. މައްސަލަ އަނބުރާ ގެންދިޔައީ، މައްސަލަ ކުރިއަށް ދަނިކޮށް ފްލެޓް ދޭން ސިފްކޯއިން ނިންމުމާއި ގުޅިގެންކަމަށް ބުނެފައިވެ އެވެ.

ނިންމުން ބަދަލުކޮށް ސިފްކޯ ފްލެޓް ހަވާލުކުރުމުގެ އެއްބަސްވުންތަކުގައި މިހާރުވަނީ ސޮއިކޮށްފަ އެވެ.

ދައުވާ ހުށަހެޅި މީހުން ބުނެފައިވަނީ އެ ފްލެޓަށް އެދުނުއިރު އަދި ފްލެޓް ލިބޭނެ ކަމަށް ލިޔުން ދޫކުރުމަށް ފަހު އޭރު ނެތް ޝަރުތެއް ކުރިމަތިކުރުވައި ފްލެޓް ނުލިބޭނެ ކަމަށް ނިންމި ނިންމުމަކީ ބާތިލް ނިންމުމެއްކަމަށެވެ.