ބޯކޮށް ވާރޭ ވެހުމާއެކު ގުގުރާނެ ކަމަށް ލަފާކޮށް ށ. އަތޮޅުން ފެށިގެން ތ. އަތޮޅަށް ރީނދޫ އެލާޓް ނެރެފި އެވެ.

މޫސުމާބެހޭ ގައުމީ އިދާރާ، މެޓް އޮފީހުން މި ދެ އަތޮޅަށް ރީނދޫ އެލާޓް ނެރެފައިވަނީ މިއަދު ހެނދުނު 9:00 އިން މެންދުރުފަހު 13:00 އާ ހަމައަށެވެ.

ވެރި ރަށް މާލެވެސް ހިމެނޭ މި ސަރަހައްދަށް ރީނދޫ އެލާޓް ނެރެފައިވާއިރު، ރޭން ފެށިގެން ވެހުނު ވާރޭގައި މާލޭގައި ވަނީ ވަރަށް ބޮޑަށް ފެން ބޮޑުވެފަ އެވެ. އެގޮތުން ސިފައިން ގެންދަނީ ހަތަރު ދަރަހައްދެެއްގައި ޕަންޕް ބަހައްޓައިގެން ފެން ހިއްކުމުގެ މަސައްކަތް ކުރަމުންނެވެ.

ރީނދޫ އެލާޓްގެ އިތުރުން މެޓުން ވަނީ ހއ. އަތޮޅުން ފެށިގެން ލ. އަތޮޅާ ހަމައަށް ހުދު އެލާޓްވެސް ނެރެފަ އެވެ. އެ އެލާޓްގައި ބުނެފައިވަނީ މިއަދު 8:45 އަކުން ފެށިގެން މެންދުރުފަހު 14:00 އާ ހަމައަށް އެ ސަރަހައްދަށް ބޯކޮށް ވާރޭވެހުމާއެކު ގުގުރާނެކަމަށް ލަފާކުރެވޭ ކަަމަށެވެ.

މީގެ އިތުރުން މިއަދު ހެނދުނު މެޓުން ވަނީ އއ. އަތޮޅާއި އދ، އަތޮޅަށް އޮރެންޖް އެލާޓް ވެސް ނެރެފަ އެވެ. ނަމަވެސް އެ އެލާޓް ނެރުނީ މިއަދު ފަތިހު 4:45 އިން ހެނދުނު 8:45 އަކަށެވެ. އެ އެލާޓް ނެރެފައިވަނީ ބޯކޮށް ވާރޭވެހި ފެން ބޮޑުވާނެކަމަށް ލަފާކޮށެވެ.

ބޯކޮށް ވާރޭވެހި މާލޭގައި ފެންބޮޑުވެގެން ވެލިބަސްތާ ޖެއްސުމާއި ފެން ހިއްކުމުގެ މަަސައްކަތް ދިވެހި ސިފައިންނާއި ފުލުހުން އަދި ސިޓީ ކައުންސިލް ގުޅިގެން ކުރަމުން ދާކަމަށް އެންޑީއެމްއޭއިން ވަނީ ބުނެފަ އެވެ. އަދި ގޭބިސީތަކުގެ ހާލަތު ގާތުން މޮނިޓާ ކުރަމުން، ލިބެމުންދާ ގެއްލުންތައް މޮނިޓާ ކުރަމުންދާކަމަށް އެންޑީއެމްއޭއިން ބުންޏެވެ.